«Ինտեր Մայամիի» գլխավոր մարզիչ Խավիեր Մասկերանոն խոստովանել է, որ թիմը տեղյակ չէր, թե ինչ թեմաների է անդրադառնալու ԱՄՆ նախագահ Դոնալդ Թրամփը Սպիտակ տանը կայացած ընդունելության ժամանակ։ Հիշեցնենք, որ իր ելույթում երկրի ղեկավարը խոսել էր Իրանի հետ հակամարտությունում ԱՄՆ-ի գրանցած հաջողությունների մասին։
«Մեզ ասել էին, թե այցն ընդամենը չեմպիոնական տիտղոսի կապակցությամբ մեզ շնորհավորելու համար է, և որ խոսելու ենք բացառապես ֆուտբոլից, սակայն ամեն ինչ այլ կերպ ստացվեց։ Մենք վաղ էինք ժամանել, երկար սպասեցինք, շատ քիչ բան հասցրեցինք տեսնել Սպիտակ տնից, իսկ նախագահին հանդիպեցինք միայն այն պահին, որն արդեն ցուցադրվեց հեռուստատեսությամբ։
Մենք բոլորս բավականաչափ հասուն ենք և կարող ենք տարանջատել երևույթները։ Այցը ծրագրվել էր ավելի քան երկու ամիս առաջ, ուստի թիմը պարզապես հետևեց նախապես համաձայնեցված արարողակարգին։ Լիովին հասկանում ենք, որ աշխարհում ներկայիս իրավիճակն էականորեն տարբերվում է այն ժամանակներից, երբ նախատեսվում էր այս հանդիպումը»,- Մասկերանոյի խոսքերն է մեջբերում Miami Herald-ը:
Կայքում տեղ գտած մտքերն ու տեսակետները հեղինակի սեփականությունն են և կարող են չհամընկնել BlogNews.am-ի խմբագրության տեսակետների հետ: