4 մարտի 2026 – 10:33 AMT
PanARMENIAN.Net – Հայաստանի արտաքին գործերի նախարար Արարատ Միրզոյանը Ֆրանսիայի Եվրոպայի և արտաքին գործերի նախարար Ժան-Նոել Բարոյի հետ հեռախոսազրույցում անդրադարձել է Մերձավոր Արևելքում ստեղծված իրավիճակին։
Զրույցի ընթացքում նրանք մտքեր են փոխանակել նաև հակամարտության գոտիներում գտնվող քաղաքացիներին աջակցություն ցուցաբերելու ուղղությամբ իրականացվող աշխատանքների վերաբերյալ։
Միրզոյանը կարևորել է խնդրի խաղաղ կարգավորման հասնելու անհրաժեշտությունը։
Արարատ Միրզոյանը և Ժան-Նոել Բարոն նաև ընդգծել են մայիսին Երևանում նախատեսված Եվրոպական քաղաքական համայնքի գագաթաժողովը բարձր մակարդակով կազմակերպելու նպատակով ցուցաբերվող ակտիվ ներգրավվածությունը։
Միրզոյանը հեռախոսազրույց է ունեցել նաև Քուվեյթի արտաքին գործերի նախարար Շեյխ Ջարրահ Ջաբեր Ալ-Ահմադ Ալ-Սաբահի հետ՝ քննարկելով Մերձավոր Արևելքում ընթացող զարգացումները և կարևորելով իրավիճակի խաղաղ կարգավորումը, հայտնում է արտաքին գործերի նախարարությունը։
«Անդրադառնալով Մերձավոր Արևելքում զարգացումներին՝ Միրզոյանը մտահոգություն է հայտնել քաղաքացիական օբյեկտներին հարվածների, քաղաքացիական անձանց շրջանում զոհերի առնչությամբ: Այս համատեքստում ընդգծվել է ստեղծված իրավիճակի շուտափույթ՝ խաղաղ հանգուցալուծման ու այդ ուղղությամբ ջանքերի կարևորությունը»,- ասվում է հաղորդագրությունում:
Փետրվարի 28-ին Իսրայելն ու ԱՄՆ-ն օդային հարվածներ են հասցրել Իրանին, հարվածների հետևանքով սպանվել է Իրանի գերագույն հոգևոր առաջնորդ այաթոլլա Ալի Խամենեին: Իրանը պատասխան կրակ է բացել Իսրայելի, ինչպես նաև Պարսից ծոցի երկրների ուղղությամբ, որտեղ տեղակայված են ԱՄՆ ռազմակայններ: