Հայ Առաքելական եկեղեցու Արագածոտնի թեմի եկեղեցական դասն իր անհամաձայնությունն է հայտնել Արմավիրի մարզի ընդհանուր իրավասության դատարանի միջանկյալ որոշումներին, որոնք վերաբերում են կարգալույծ արված երկու հոգևորականի ծառայության վերականգնմանը:
Հայտարարության մեջ ասվում է, որ դատարանը փաստացի իրենց պարտադրում է որպես հոգևոր հովիվներ ճանաչել Մայր Աթոռ Սուրբ Էջմիածնի կողմից կարգալույծ հռչակված նախկին քահանաներ Ստեփան Ասատրյանին և Արամայիս Թախմազյանին։
Հայտարարության հեղինակներն ընդգծում են, որ դատական վճիռներն անհամատեղելի են եկեղեցական կանոնական կյանքի, մեր քահանայական (եկեղեցական) կոչման և ծառայության հետ։ Նրանք ընդգծել են, որ եկեղեցու կողմից քահանայի իշխանությունը շնորհվում է ձեռնադրությամբ և օծմամբ։ Շեշտել են, որ ուխտը խախտած քահանաները դասվում են աշխարհականների շարքին։
Կարգից զրկելը, հոգևորականների փոխանցմամբ, նշանակում է քահանայական ծառայություն իրականացնելու իրավունքի կորուստ, և դա չի կարող փոխվել որևէ աշխարհիկ որոշմամբ: Հոգևորականները հայտարարել են, որ դատական վճիռների կատարումն իրենց համար օբյեկտիվորեն անհնար է դառնում, քանի որ դա հակասում է կանոնական կարգին, իրենց քահանայական երդմանը և խղճի ազատությանը:
«Դատական միջանկյալ որոշումների և մեր խղճի, դավանանքի ու համոզմունքի ազատության իրավունքի միջև առկա է լուրջ անհամատեղելիություն»,- հայտարարել են նրանք։
Հայտարարության մեջ նաև ընդգծվում է, որ Հայաստանի օրենսդրությունը և Մարդու իրավունքների և հիմնարար ազատությունների պաշտպանության մասին կոնվենցիան երաշխավորում են Հայաստանյայց Առաքելական Սուրբ եկեղեցու ինքնակառավարման իրավունքը։ Նշել են, որ պետությունն, ըստ օրենքի, իրավունք չունի միջամտելու եկեղեցու ներքին կյանքին, ներառյալ կարգից զրկելու և հոգեւոր անձանց նշանակման հարցերը: Փաստաթուղթը ստորագրել է թեմի 25 հոգևորական:
Ասատրյանը և Թամրազյանը 2025-ին միացել էին Ամենայն Հայոց կաթողիկոս Գարեգին 2-րդի և եկեղեցու դեմ գործընթացներին, ինչից հետո Վեհափառի կողմից կարգալույծ էին հռչակվել։ Նրանք, սակայն, չեն ընդունում իրենց ներկայիս կարգավիճակը՝ շարունակելով ծեսեր մատուցել։
Կարդացեք նաև՝
Նախկին հոգևորականների «արարողությունները» վավերական չեն․ Արագածոտնի թեմ
Դատարանը կարգալույծ քահանաների՝ եկեղեցու դեմ հայցերով որոշումներ է կայացրել
