«Մոջահեդներ, կրա՛կ բացեք Պակիստանի վրա»
Երեկ ուշ երեկոյան աֆղանա-պակիստանյան սահմանին մարտեր են սկսվել: «Աստված մեծ Է: Այո՛, մոջահեդներ, կրա՛կ, կրա՛կ բացեք Պակիստանի պահակակետի վրա»,- հրամայել Է աֆղանական ջոկատի հրամանատարը:
Երկու կողմերի ռազմական ղեկավարները հրամաններ արձակելիս արաբերեն վանկարկում են. «Ալահու աքբար. Աստված մեծ Է», ապա հրթիռներն ու արկերը սլանում են դիրքերի վրա, պայթում ու մարդկանց են սպանում:
Աֆղանցիները կիրառում են հրազեն ու հրետանի, պակիստանցիները դրան նաև օդուժի ռումբերն ու հրթիռներն են ավելացնում:
Քաբուլը հայտարարել Է, թե 15 սահմանային հենակետ Է գրավել: Օրեր առաջ պակիստանյան օդուժն Է հարվածել աֆղանական տարածքին:
Կողմերի մարտավարությունը «պատասխան տալն Է»
Իսլամաբադը, իր հերթին, հաղորդել Է աֆղանական զինտեխնիկա և ամրաշինություններ ոչնչացնելու մասին: Պակիստանի ինֆորմացիայի նախարար Աթաուլա Թարարի խոսքով, օդուժը Քաբուլում ոչնչացրել Է մի շարք ռազմական թիրախներ, այդ թվում բրիգադների կենտրոնակայանը և զինապահեստը:
Աֆղանստանի պաշտպանության նախարարությունը հայտարարել Է, թե երեկվա գրոհով ավարտել Է պատասխան գործողությունը, որին դիմել Է այն բանից հետո, երբ Պակիստանի զինուժը խախտել Է Աֆղանստանի տարածքային ամբողջականությունը:
Քաբուլը պնդում Է, որ գրավել Է պակիստանյան երկու ռազմակայան և 19 պահակակետ, 4 սահմանային պահակակետից Էլ պակիստանցիները փախուստի են դիմել:
Իսլամաբադում հայտնել են, որ պակիստանցիների հարվածների հետևանքով սպանվել Է առնվազն 133, վիրավորվել Է ավելի քան 200 աֆղանստանցի զինվոր և ոչնչացվել Է 80 միավոր զինտեխնիկա:
Աֆղանստանի պաշտպանական գերատեսությունն Էլ պնդում Է, որ մարտերում ոչնչացվել Է 55 պակիստանցի զինծառայող, գերեվարվել են մի քանիսը, ոչնչացվել և առգրավվել են հրասայլեր, թեթև ու ծանր զինտեխնիկա: Պակիստանի հարվածներից վիրավորվել Է 13 խաղաղ բնակիչ:
Այս տարվա արյունալի փետրվարը
Ինչո՞ւ են երկու հարևան երկրների բանակները ներքաշվել արյունալի առճակատման մեջ: Փետրվարի 22-ին պակիստանցիները հարվածներ են հասցրել Աֆղանստանի տարածքում ապաստանած մոլեռանդ ջիհադական երկու խմբավորումների՝ «Թեհրիք Թալիբան Պակիստան»-ի և «Իսլամական պետություն» ահաբեկչական կառույցի մասնաճյուղ «Վիլայաթ Խորասան»-ի դիրքերին:
Ըստ Իսլամաբադի, այդ երկու խմբավորումները Պակիստանում իրականացրել են ահաբեկչական գործողություններ, այդ թվում մայրաքաղաքում փետրվարի 6-ին մզկիթ են պայթեցրել: Գրոհի հետևանքով սպանվել Է ավելի քան 30 և վիրավորվել շուրջ 200 շիա հավատացյալ:
Քաբուլը «սադրանք» Է անվանել Իսլամաբադի գրոհը, հաղորդելով, որ դրա հետևանքով սպանվել են տասնյակ խաղաղ բնակիչներ, այդ թվում կանայք և երեխաներ: Աֆղանստանը պնդում Է, որ կշարունակի պատասխանել Պակիստանի կողմից երկրի տարածքային ամբողջականությունը խախտելու փորձերին:
Քաբուլը և Իսլամաբադը դիվանագիտական խողովակներով միմյանց փոխանցում են ուղերձներ զինված առճակատումը խաղաղ եղանակով ավարտելու անհրաժեշտության մասին:
Իրանը հայտնել Է, թե պատրաստ Է հանդես գալ որպես միջնորդ: Միջազգային համայնքը կողմերին հորդորում Է անհապաղ դադարեցնել կրակը: Իրավիճակը տակավին մտահոգիչ Է: