«Մենք ունեցել ենք շատ կոնստրուկտիվ հանդիպում անհատ տաքսի վարորդների հետ, որոնք օգտվում են օնլայն պլատֆորմներից: Նրանց հետ քննարկել ենք իիրենց կողմից բարձրացված բոլոր հարցերը, որոնց մի փոքր մասն է վերաբերում Կառավարությանը, մյուս մասը վերաբերում է այլ պլատֆորմների»,-ասուլիսի ժամանակ ասել է ՀՀ աշխատանքի և սոցիալական հարցերի նախարար Արսեն Թորոսյանը՝ անդրադառնալով տաքսու վարորդների բողոքի ակցիաներին, որով նրանք դժգոհում են, որ վճարում են հարկեր, բայց չեն համարվում գրանցված աշխատողներ: «Ինչպես մեր բոլոր քաղաքացիները, այնպես էլ մեր այս քաղաքացիները կարևոր են, և մենք զբաղվում ենք իրենց խնդիրների լուծմամբ: Մյուս շաբաթ էլի հանդիպումներ ու քննարկումներ ենք ունենալու»,- հայտնել է Թորոսյանը՝ նշելով, որ որոշ հարցեր արդեն գիտեն, թե ոնց են լուծելու, օրինակ՝ կենսաթոշակների հարցերը:
«Մենք իրականության մեջ նայել ենք, այդտեղ անլուծելի հարց չկա, բայց նաև կա համադրելի հարց, օրինակ, մյուս տեսակի աշխատողների վճարած հարկերի նկատմամբ, դրանք հետո ինչպիսի ծառայություններ են դառնում իրենց համար: Գործընթացը կշարունակենք: Այն, ինչ որ հնարավոր կլինի փոխել, կփոխենք»,- հավելել է նա: