Տասներկու ամերիկյան F-22 կործանիչներ վայրէջք են կատարել Իսրայելի հարավում գտնվող ավիաբազայում, հաղորդել է պետական Kan հեռարձակողը։
Հեռարձակողի տվյալներով՝ F-22-ները տեղակայվել են Իսրայելում՝ որպես ԱՄՆ-ի Մերձավոր Արևելքում տեղակայման մաս։
Ինչպես նախկինում հաղորդել էր The Washington Post (WP)-ն՝ հղում անելով արբանյակային պատկերներին և թռիչքի տվյալների վերլուծությանը, ԱՄՆ-ը մեծացրել է իր ռազմական ներկայությունը Իրանի մոտակայքում՝ տեղակայելով ավելի քան 150 ինքնաթիռ Եվրոպայի և Մերձավոր Արևելքի բազաներում՝ փետրվարի 17-ին Ժնևում Վաշինգտոնի և Թեհրանի միջև կայացած բանակցություններից հետո։ WP-ն նշել է, որ տարածաշրջանում ԱՄՆ ներկայիս ռազմական ներկայությունն ամենամեծն է 2003 թվականի Իրաքում գործողությունից ի վեր։
Ավելի վաղ հունական Proto Thema թերթը հաղորդել էր, որ ԱՄՆ ավիակիր USS Gerald R. Ford-ը՝ տասնյակ լրացուցիչ ինքնաթիռների հետ, ժամանել է հունական Կրետե կղզու Սուդայի ծոցի ամերիկյան բազա և այնտեղ կմնա մինչև փետրվարի 27-ը։