Ավելի քան հարյուր հայկական բեռնատարներ, հիմնականում շինանյութ տեղափոխող, կուտակվել են Կոբիի տերմինալում՝ Վրաստան–Ռուսաստան սահմանին գտնվող «Վերին Լարս» անցակետի հարևանությամբ։
Վրաստանի ֆինանսների նախարարության Եկամուտների ծառայությունից հայտարարել են, որ որևէ արհեստական խոչընդոտ չկա, իրականացվում են մաքսային հսկողության ստանդարտ ընթացակարգեր։ Նրանց խոսքով՝ սկսվել է մեքենաների փուլային բացթողումը, որը շարունակվելու է։
Սակայն վարորդները պնդում են հակառակը։ Բեռնատարի վարորդ Գևորգ Սարգսյանի խոսքով՝ վրացական կողմը փաստացի փակել է դեպի Հայաստան տանող ճանապարհը և անցման համար պահանջում է 700 ԱՄՆ դոլար։
«Պարզապես ուզում են գումար՝ առանց պատճառաբանության։ Հայաստանի կողմից էլ ոչ ոք ոչինչ չի բացատրում։ Մենք չգիտենք՝ ինչ է լինելու հետո»,– նշել է նա։
Փետրվարի 12-ից հայ փոխադրողները հայտնում են, որ իրենց թույլ չեն տալիս Վրաստանի տարածքով մուտք գործել Հայաստան։ Նրանց խոսքով՝ խոսքը մոտ հարյուր բեռնատարի մասին է, և վրացական կողմից պաշտոնական պարզաբանումներ մինչ այժմ չեն ստացել։
«Ասում են՝ կանգնեք, հայկական բեռը չենք բաց թողնի, քանի դեռ հրաման չենք ստացել»,– փոխանցել են վարորդները։