Ֆրանսիան պատրաստվում է ԱՄՆ դեսպան Չարլզ Քուշներին հրավիրել ԱԳՆ՝ բողոք հայտնելու ծայրահեղ աջ ակտիվիստի մահվան վերաբերյալ Թրամփի վարչակազմի հայտարարությունների կապակցությամբ։ Այս մասին հայտարարել է Ֆրանսիայի արտաքին գործերի նախարար Ժան-Նոել Բարոն։
Նա արձագանքել է ԱՄՆ Պետդեպարտամենտի հակաահաբեկչական բյուրոյի հրապարակմանը X հարթակում, որտեղ նշվել էր. «Ֆրանսիայի ներքին գործերի նախարարի կողմից հաստատված հաղորդումները, ըստ որոնց Քվենտին Դերանքը սպանվել է ձախակողմյան մարտական խմբերի կողմից, պետք է մտահոգեն մեզ բոլորիս»։
Ծայրահեղ աջ ակտիվիստ Քվենտին Դերանքը նախորդ շաբաթ մահացել է ուղեղի ծանր վնասվածքներից՝ Լիոն քաղաքում ծեծի ենթարկվելու հետևանքով։ Նրա վրա հարձակումը տեղի է ունեցել ուսանողական հավաքի շրջանակում ծագած բախման ժամանակ։ Այդ միջոցառմանը հիմնական բանախոս էր ձախակողմյան պատգամավոր Ռիմա Հասանը։
Սպանությունը խորացրել է քաղաքական լարվածությունը՝ առաջիկա նախագահական ընտրություններից առաջ։ Ֆրանսիայի նախագահ Էմանուել Մակրոնը շաբաթ օրը կոչ է արել պահպանել հանդարտություն այն բանից հետո, երբ Լիոնում շուրջ 3000 մարդ մասնակցել է ծայրահեղ աջ կազմակերպությունների կազմակերպած երթին՝ ի հիշատակ Դերանքի։
«Մենք մերժում ենք այս ողբերգության որևէ քաղաքական շահարկում, որը սուգի մեջ է գցել ֆրանսիական մի ընտանիքի», — հայտարարել է Բարոն։ «Մենք որևէ դաս քաղելու կարիք չունենք, հատկապես բռնության հարցում, միջազգային ռեակցիոն շարժումից»։
ԱՄՆ Պետդեպարտամենտը իր հրապարակման մեջ նաև նշել է, որ «բռնի արմատական ձախականությունը աճում է, և դրա դերը Քվենտին Դերանքի մահվան մեջ ցույց է տալիս այն սպառնալիքը, որը այն ներկայացնում է հանրային անվտանգության համար։ Մենք շարունակելու ենք հետևել իրավիճակին և ակնկալում ենք, որ բռնության հեղինակները կկանգնեն արդարադատության առջև»։
Բարոն նշել է, որ Քուշների հետ քննարկելու է նաև այլ հարցեր, այդ թվում՝ ԱՄՆ-ի կողմից սահմանված պատժամիջոցները սոցիալական մեդիայի կանոնների վերահսկման համար պատասխանատու ԵՄ նախկին հանձնակատար Թիերի Բրետոնի և Միջազգային քրեական դատարանի ֆրանսիացի դատավոր Նիկոլա Գիյուի նկատմամբ։