ՀԷՑ գլխավոր տնօրենի նախկին պաշտոնակատար Դավիթ Ղազինյանը 4 հարցադրում է հնչեցրել ուղղված ՀԷՑ-ի ներկայիս ժամանակավոր կառավարչին և առաջարկել լրագրողներին դրանք հնչեցնել առաջիկա մամլո ասուլիսի ժամանակ։
«Առաջինը՝ Ձեր կողմից նշանակված պաշտոնյաները տեղեկացրե՞լ են Ձեզ, որ ՀԷՑ-ի կողմից վերցված վարկերը չեն մտնում սակագնի մեջ, այսինքն՝ ժողովուրդը դրա համար չի վճարում։ Ինչո՞ւ և ինչ նպատակով եք Դուք, այդ տեղեկատվությանը տիրապետելով, ամեն դեպքում հակառակն ասում։
Երկրորդը՝ ինչո՞ւ և ինչ հեռահար նպատակով չի կատարվել ընդունում-հանձնումը, այսինքն՝ Ձեր նշանակումից հետո որևէ ընդունում-հանձնում չի իրականացվել նախկին ղեկավարների հետ։
Երրորդը՝ հայտարարելով, որ գնում եք ՀԷՑ հանուն ՀՀ-ի, ինչո՞ւ եք մինչև այսօր ստանում Ձեր նախկին պաշտոնի մոտավորապես յոթապատիկ աշխատավարձը։ Խնդրում եմ ուղիղ հայտարարել Ձեր ստացած աշխատավարձի և պարգևատրումների չափը։
Չորրորդը՝ ինչպես հիշում եք, շատ վաղուց հրավիրել էի բանավեճի Հանրային ծառայությունները կարգավորող հանձնաժողովի նախագահին և կառավարչին։ Հարց է առաջանում՝ ինչո՞ւ և ինչ պատճառներով եք խուսափել բանավեճից։ Մի՞թե որպեսզի մեր ժողովուրդն ամեն ինչ չիմանա»,- հարցերը ներկայացրել է Դավիթ Ղազինյանը: