ԱՄՆ նախագահ Դոնալդ Թրամփը պատրաստ է Իրանին առավելագույնը 15 օր տրամադրել միջուկային համաձայնագիր կնքելու համար։
Այս մասին Սպիտակ տան ղեկավարը լրագրողներին ասել է Խաղաղության խորհրդի առաջին նիստից անմիջապես հետո։
«Մենք կամ կկնքենք համաձայնագիր, կամ կստանանք այն այս կամ այն կերպ։ 10-15 օրը, ըստ էության, առավելագույնն է», – ասել է Թրամփը։
Ավելի վաղ, Խաղաղության խորհրդի առաջին նիստի ժամանակ իր ելույթում ԱՄՆ նախագահը սպառնացել էր «վատ հետևանքներով» Իրանի իշխանություններին, եթե Թեհրանը 10 օրվա ընթացքում համաձայնագիր չկնքի։
The Wall Street Journal-ը հայտնել է, որ Միացյալ Նահանգները Մերձավոր Արևելքում կուտակում է իր ամենամեծ ռազմաօդային ուժերը 2003 թվականին Իրաք ներխուժումից ի վեր։ Սակայն, ըստ թերթի, Դոնալդ Թրամփը դեռևս վերջնական որոշում չի կայացրել Իրանի նկատմամբ ձեռնարկվելիք գործողությունների վերաբերյալ։