Վաշինգտոնում Խաղաղության խորհրդի առաջին գագաթնաժողովի իր ելույթում ԱՄՆ նախագահ Դոնալդ Թրամփը դարձյալ հիշեցրել է, որ ներդրում է ունեցել ութ հակամարտությունների կարգավորման մեջ, այդ թվում՝ Հայաստանի և Ադրբեջանի։
«30 տարի պայքար, ու մենք ամեն ինչ լուծեցինք։ Մեծ շնորհակալություն ձեզ։ Դա մեծ գործ է։ Ես կարծում եմ, որ նրանք (ի նկատի ունի Նիկոլ Փաշինյանին և Իլհամ Ալիևին- խմբ.) ընկերներ են դարձել։ Ես վստահ չեմ, թե կարող եմ դա ասել, բայց այդպես եմ կարծում»,- հայտարարել է Թրամփը՝ մեկնաբանելով Հայաստանի ու Ադրբեջանի հարաբերությունների կարգավորման ընթացքը։
ԱՄՆ առաջնորդը Փաշինյանին և Ալիևին անվանել է նաև «լավ մարդիկ ու կոշտ առաջնորդներ»։ «Մենք խաղաղություն ունենք երկու շատ կարևոր երկրների միջև, և ես դա երբեք չեմ մոռանա»,- հավելել է Թրամփը։
ԱՄՆ նախագահը նաև ընդգծել է, որ գրեթե բոլոր հակամարտությունները, որոնք հնարավոր է եղել կարգավորել իր միջնորդությամբ, լուծվել են «գրեթե երկու օրվա ընթացքում»։
Լուսանկարը՝ ՀՀ վարչապետի մամուլի ծառայության
Եթե գտել եք վրիպակ, ապա այն կարող եք ուղարկել մեզ՝ ընտրելով վրիպակը և սեղմելով CTRL+Enter