Ոստիկանները խոհանոցի ակնհայտ տեսանելի հատվածում նկատել են թմրանյութի նմանվող զանգվածով թափանցիկ տոպրակ. ՖՈՏՈ
ԵՐԵՎԱՆ, 18 փետրվարի․/Նովոստի–Արմենիա/․ Համայնքային ոստիկանության Դիլիջանի բաժնի ծառայողները 51-ամյա տղամարդու բնակարանում կատարված զննությամբ հայտնաբերել են 74,73 գրամ թմրամիջոցի նմանվող զանգված:
Այս մասին հայտնում է ՆԳՆ ոստիկանությունը։
Ըստ հաղորդագրության, Դիլիջանի բաժնի ծառայողները, իրացնելով թմրամիջոց պահելու և օգտագործելու վերաբերյալ օպերատիվ տեղեկությունները, փետրվարի 12-ին այցելել են Դիլիջան քաղաքի բնակիչ 51-ամյա տղամարդու բնակարան, որտեղ խոհանոցի ակնհայտ տեսանելի հատվածում նկատել են թմրանյութի նմանվող զանգվածով թափանցիկ տոպրակ:
Նշվում է, որ 51-ամյա տղամարդը ձերբակալվել և կազմված փաստաթղթերի հետ ներկայացվել է նախաքննական մարմին:
Նախաձեռնվել է քրեական վարույթ:
