Իրանի գերագոյն հոգեւոր պետ այաթոլլա Ալի Խամենէի յայտարարեց. «Մեր հրթիռներուն տեսակն ու հասողութիւնը իրանցի ժողովուրդին առնչուող ներքին հարցեր են, եւ Միացեալ Նահանգներուն չեն վերաբերիր»:
«Առանց զսպիչ զէնքի որեւէ պետութիւն արժանի է իր թշնամիներու ոտքերուն տակ ճզմուելու», աւելցուց ան:
«Ամերիկացիները գիտեն, թէ ապագային իրենց ինչ կը սպասէ, եթէ որեւէ սխալ գործեն», նշեց Խամենէի:
Իրանի գերագոյն հոգեւոր պետը նաեւ նշեց, որ Միացեալ Նահանգներու նախագահ Տանըլտ Թրամփ «միշտ կը կրկնէ` «մեր բանակը աշխարհի վրայ հզօրագոյնն է», սակայն աշխարհի վրայ հզօրագոյն բանակը երբեմն կրնայ ստանալ ապտակ մը, որ զայն անկարող կը դարձնէ իր տեղէն ոտքի կանգնիլ»:
«Անոնք (Միացեալ Նահանգները, «Ա.») տեւաբար կ՛ըսեն, թէ օդանաւակիրներ դէպի Իրան ղրկեցինք: Շատ լաւ, օդանաւակիրը վտանգաւոր է, սակայն անկէ աւելի վտանգաւորը զայն ծովուն յատակը ընկղմելու կարող զէնքն է», յայտնեց Խամենէի:
«Միացեալ Նահանգներու նախագահը իր վերջին յայտարարութիւններէն մէկուն մէջ ըսաւ, թէ Միացեալ Նահանգներ 47 տարիներ չկարողացան Իսլամական Հանրապետութեան վերջ տալ, եւ իր ժողովուրդին այդ մասին գանգատեցաւ, եւ ասիկա լաւ խոստովանութիւն է: Անոր կ՛ըսեմ` դուն եւս պիտի չկարողանաս այդ մէկը կատարել», ըսաւ Իրանի գերագոյն հոգեւոր պետը:
«Ամերիկեան կողմը կ՛ըսէ, եկէք հիւլէական ուժանիւթին շուրջ բանակցինք, եւ բանակցութիւններուն արդիւնքը ըլլայ այն, որ զայն չունիք: Եթէ իրապէս բանակցութիւններ տեղի կ՛ունենան, ապա անոնց արդիւնքները կանխաւ կարելի չէ ճշդել: Եթէ կ՛ակնկալուի, որ բանակցութիւններ տեղի ունենան, ապա անոնց արդիւնքը կանխաւ ճշդելը սխալ ու անմիտ արարք է», շեշտեց Խամենէի: