Միացեալ Նահանգներու արտաքին գործոց նախարար Մարքօ Ռուպիօ Անվտանգութեան Միւնիխի խորհրդաժողովի ընթացքին խօսք մը արտասանելով յայտնեց. «Այսօր մարդկութեան պատմութեան մէջ որեւէ այլ պահէ աւելի նոր հակամարտութեան մը կարելիութիւնը կը տեսնենք»` նշելով. «Գոյութիւն ունին պետութիւններ, որոնք իրենց շահերու իրագործման համար բիրտ ուժ կիրարկելու չտատամսեցան»:
«Միացեալ Նահանգները նախագահ Տանըլտ Թրամփի նստաշրջանին կ՛ուզեն աշխարհի վերակառուցումը ղեկավարել, եւ անոր նախագահութեան տակ Ամերիկան պիտի ստանձնէ վերանորոգման ու բարեփոխման առաքելութիւնը», յայտարարեց ամերիկեան դիւանագիտութեան պետը:
«Ամերիկեան ղեկավարութիւնն է, որ Կազայի մէջ գերիները ազատագրեց», նշեց ան:
«Կարելի չէ համաշխարհային համակարգը ժողովուրդներու շահերէն վեր դասել, ո՛չ ալ արտօնել անոնց, որոնք միջազգային կայունութիւնը վտանգի կ՛ենթարկեն, միջազգային օրէնքի ետին պահուըտելով», ըսաւ ան:
«Միացեալ Նահանգներն ու Եւրոպան միասնաբար արեւմտեան քաղաքակրթութեան կը պատկանին եւ իրարու կապուած են: Անոնց ճակատագիրները միացեալ են», յայտնեց Ռուպիօ` աւելցնելով, որ իր երկիրը կը յուսայ, որ Եւրոպան ըլլայ «հզօր, որովհետեւ դաշնակիցներու տկարութիւնը բոլորը կը տկարացնէ»:
«Չենք ուզեր Եւրոպայէն անջատուիլ, այլ անոր հետ վերադաշնակցիլ: Վերստին դաշնակցիլը պէտք է կեդրոնանայ հասարակաց շահերուն եւ նոր սահմաններու բացման վրայ, եւ պէտք է կարենայ պաշտպանել հասարակաց քաղաքակրթութիւնն ու շահերը, ինչպէս նաեւ ճակատագիրը ուրուագծել», ըսաւ ան:
Անդրադառնալով գաղթի թղթածրարին` Ռուպիօ յայտնեց. «Աննախադէպ գաղթի ալիքի առջեւ դռները բանալը վտանգեց ընկերութեան միասնականութիւնն ու ժողովուրդներու ապագան: Անհրաժեշտ է վերահսկել ազգային սահմաններուն եւ այն անձերուն, որոնք երկիր մուտք կը գործեն»:
«ՄԱԿ-ը հակամարտութիւններու լուծման մէջ դեր չի խաղար», նշեց Միացեալ Նահանգներու արտաքին գործոց նախարարը: