Խորհրդարանի նախագահի քաղաքական օգնական, երեսփոխան Ալի Հասան Խալիլ յայտնեց. «Յառաջիկայ խորհրդարանական ընտրութիւնները երկրի քաղաքականութեան ու կառավարման ուղղութեան որոշման կարեւորագոյն շրջադարձային պահն են: Այսօր Պըրրին այս հարցը յստակ արտայայտեց խօսքով եւ գործով:
«Մենք կողմ ենք ընտրութիւնները իրենց ժամկէտին կատարելուն, եւ մարդոց միտքերը շփոթեցնելն ու մեզ որեւէ պատրուակով յետաձգման փուլ մտցնելը դարձած է անընդունելի, գոնէ մեզի համար»:
«Մենք ամենայն պատասխանատուութեամբ դէպի ընտրապայքար կ՛ուղղուինք ներքին գործոց նախարարութեան ճշդած ժամկէտներուն», ըսաւ ան` աւելցնելով. «Ո՛չ յետաձգման եւ ո՛չ զանոնք որեւէ պատրուակով ուշացնելուն, որովհետեւ ատիկա ամբողջ աշխարհին կը յղէ վատ պատգամ մը, թէ մենք անկարող ենք սահմանադրական այս գործողութիւնը կատարելու:
«Մեկնելով ատկէ, կ՛ըսենք, թէ ան, որ կ՛ուզէ մարդոց ընտրանքին դիմել, թող քուէատուփ ուղղուի, ամենայն պատասխանատուութեամբ ու յստակութեամբ, եւ մրցակցի քաղաքական հռետորաբանութեան հիմամբ` հեռու մնալով մոլեռանդութեան հրահրումէն, պառակտումի յառաջացումէն կամ խորագիրներէն, ըլլայ այդ համայնքային, շրջանային կամ կուսակցական»:
«Այսօր, աւելի քան երբեւէ, մենք կ՛ուզենք վերակենդանացնել թշնամիին դիմադրելու մեր անաղարտ յիշողութիւնը` մերժելով այս ժողովուրդը եւ անոր արժանապատուութիւնը պաշտպանելու համար աշխատանք տարածները հետապնդելու համար որեւէ տրամաբանութիւն:
«Մենք անկեղծօրէն կը սպասենք պետութեան մը, որ պէտք է ըլլայ ուժեղ, կարող եւ արդար. պետութիւն մը, որ կրնայ պաշտպանել իր գերիշխանութիւնը, պաշտպանել իր ժողովուրդը եւ օգտագործել իր ամբողջ ուժը` յարձակումը կանխարգիլելու եւ այս թշնամիին կողմէ ամբողջ Լիբանանի տարածքին իրականացուող բաց արիւնահեղութիւնը դադրեցնելու համար», նշեց Ալի Հասան Խալիլ: