Եվրոպան պետք է ինքնուրույն սահմանի իր անվտանգության նոր ճարտարապետությունը, ներառյալ՝ միջուկային զսպման մոտեցումների հնարավոր վերանայումը, հայտարարել է Ֆրանսիայի նախագահ Էմանուել Մակրոնը Մյունխենի անվտանգության համաժողովում, փոխանցում է Euronews-ը։
Մակրոնի խոսքով՝ ներկայիս անվտանգության համակարգն այլևս չի դիմանա «ագրեսիվ Ռուսաստանի» կողմից առաջադրվող մարտահրավերներին, և եվրոպացիները պետք է իրենք սահմանեն նոր պարամետրեր՝ հիմնվելով իրենց աշխարհագրության և Մոսկվայի հետ համակեցության երկարաժամկետ իրականության վրա։ Նա ընդգծել է, որ անվտանգության ապագա ճարտարապետության վերաբերյալ բանակցությունները պետք է վարեն հենց եվրոպացիները։
Ֆրանսիայի նախագահը ենթադրել է, որ ապագա համակարգը կարող է ներառել եվրոպացի դաշնակիցների շրջանում միջուկային զսպման «համալիր» մոտեցում: Նա հայտարարել է Գերմանիայի կանցլեր Ֆրիդրիխ Մերցի և այլ առաջնորդների հետ ռազմավարական երկխոսության մեկնարկի մասին՝ պաշտպանական դոկտրինաները համակարգելու համար։
Մակրոնի հայտարարությունները հնչում են Եվրոպայի կախվածությունն ամերիկյան «միջուկային հովանոցից» նվազեցնելու վերաբերյալ քննարկումների և տրանսատլանտյան անվտանգության մոդելի կայունության վերաբերյալ աճող կասկածների ֆոնին։ Մյունխենի անվտանգության համաժողովն ավանդաբար հանդիսացել է որպես ռազմավարական սպառնալիքների և եվրոպական ու համաշխարհային անվտանգության ապագայի քննարկման հիմնական հարթակ։
