Պետք է լավ պատրաստվենք, այսօր ֆուտբոլում հեշտ մրցակիցներ չկան, և մեր խմբում էլ բոլոր թիմերը վտանգավոր են. Եղիշե Մելիքյան

Բելգիայի մայրաքաղաք Բրյուսելում կայացել է Ազգերի Լիգայի 2026-27 մրցաշրջանի վիճակահանությունը:

Հայաստանի ազգային հավաքականն ընդգրկված էր C լիգայի 2-րդ զամբյուղում: Մեր ընտրանու մրցակիցներն են Չեռնոգորիան, Կիպրոսը, Լատվիան կամ Ջիբրալթարը:

ՀՖՖ հաղորդմամբ, Հայաստանի ազգային հավաքականի գլխավոր մարզիչ Եղիշե Մելիքյանը և ավագ Էդուարդ Սպերցյանը մեկնաբանել են Ազգերի Լիգայի վիճակահանության արդյունքները: 

Ազգային ընտրանու գլխավոր մարզիչը նշել է. «Գոհ ենք վիճակահանությունից: Պետք է լավ պատրաստվենք, այսօր ֆուտբոլում հեշտ մրցակիցներ չկան, և մեր խմբում էլ բոլոր թիմերը վտանգավոր են: Առջևում ընկերական խաղեր են, պետք է պատրաստվենք ու փորձենք անել առավելագույնը: Ֆուտբոլում կարևորը վստահությունն է, որը մենք զգում ենք»: 

Հայաստանի ազգային հավաքականի ավագ Էդուարդ Սպերցյանն էլ ընդգծել է, որ հետաքրքիր հանդիպումներ են լինելու. «Անհամբեր սպասում ենք պաշտոնական խաղերին: Առաջիկայում ընկերական հանդիպումներն են, որոնց միջոցով էլ կսկսենք նախապատրաստվել: Մեր նպատակը լավ պատրաստվելը և խմբում առաջին տեղը զբաղեցնելն է: Հետաքրքիր խաղեր են լինելու»:  

Մեր ընտրանին պատմության մեջ 3-րդ անգամ կմասնակցի Ազգերի Լիգայի C Լիգային.

Տուր 1։ 2026թ սեպտեմբերի 24-26

Տուր 2։ 2026թ սեպտեմբերի 27-29

Տուր 3։ 2026թ սեպտեմբերի 30-հոկտեմբերի 3

Տուր 4։ 2026թ հոկտեմբերի 4-6

Տուր 5։ 2026թ նոյեմբերի 12-14

Տուր 6։ 2026թ նոյեմբերի 15-17

A Լիգայի քառորդ եզրափակիչներ՝ 2027 թվականի մարտի 25-30

A/B և B/C Լիգայի փլեյ-օֆֆի խաղեր՝ 2027 թվականի մարտի 25-30

Եզրափակիչ մրցաշար՝ 2027 թվականի հունիսի 9-13

C/D փլեյ-օֆֆ՝ 2028 թվականի մարտի 23-28