Մոսկվան և Երևանը կսկսեն բանակցություններ Ադրբեջանին և Թուրքիային միացված հայկական երկաթուղիների երկու հատվածների վերականգնման վերաբերյալ: Այս մասին լրագրողներին հայտարարել է Ռուսաստանի փոխվարչապետ Ալեքսեյ Օվերչուկը։
«Հայկական կողմի խնդրանքին համապատասխան և Հայաստանի ժողովրդի նկատմամբ բարեկամական և եղբայրական զգացմունքներից ելնելով՝ Ռուսաստանի Դաշնությունը որոշել է սկսել բովանդակային բանակցություններ հայկական երկաթուղիների երկու հատվածների վերականգնման վերաբերյալ, որոնք կապահովեն դրանց կապը Ադրբեջանի Հանրապետության երկաթուղիների հետ Երասխ գյուղի մոտ, ինչպես նաև Թուրքիայի Հանրապետության երկաթուղիների հետ Ախուրյան գյուղի մոտ»,- նշել է նա։
Փոխվարչապետի խոսքով՝ վերականգնվող երկաթուղային հատվածների ընդհանուր երկարությունը մոտավորապես 1.6 կմ և 12.4 կմ է։ Բանակցությունների ընթացքում նախատեսվում է որոշել այս նախագծի իրականացման տեխնիկական, ֆինանսական և այլ եղանակները։
«Մենք բարձր ենք գնահատում ռուսական փորձի, գիտելիքների և տեխնոլոգիաների նկատմամբ վստահությունը, որը հայկական կողմը կրկին ցույց է տվել՝ դիմելով Ռուսաստանին», – շարունակել է Օվերչուկը։
«Այս հատվածների վերականգնումը Ռուսաստանի Դաշնությանը կապահովի ուղիղ երկաթուղային կապ Ադրբեջանի Նախիջևանի Ինքնավար Հանրապետության, Թուրքիային՝ մուտք դեպի Միջերկրական ծովի նավահանգիստներ, իսկ Իրանին՝ մուտք դեպի Պարսից ծոցի և Հնդկական օվկիանոսի նավահանգիստներ»։
Ռուսաստանի Դաշնության փոխվարչապետի խոսքով՝ այս խոշոր մարտահրավերը լուծելու համար աշխատանքներ են տարվում Կովկասում բոլոր խափանված երթուղիների ապաշրջափակման ուղղությամբ, այդ թվում՝ Աբխազիայի միջոցով Ռուսաստանի և Վրաստանի միջև երկաթուղային կապի վերականգնման հնարավորության ուղղությամբ։
«Կովկասում տրանսպորտային և լոգիստիկ կապի ամրապնդումը չափազանց կարևոր է Հայաստանի, Ադրբեջանի, Վրաստանի, Իրանի, Թուրքիայի և Ռուսաստանի ժողովուրդների խաղաղության, կայունության և տնտեսական բարգավաճման համար։ Մենք հույս ունենք տարածաշրջանի բոլոր պետությունների կառուցողական համագործակցության վրա այս կարևոր ընդհանուր խնդիրը լուծելու գործում», – եզրափակել է նա։