Մի շարք գերատեսչություններ ունեն նվագախմբեր, երգչախմբեր։ Նրանք, ովքեր չունեն նվագախմբեր կամ երգչախմբեր, թող հրավիրեն, որպեսզի նրանք կատարեն, ասել է Փաշինյանը
ԵՐԵՎԱՆ, 12 փետրվարի․/Նովոստի–Արմենիա/․ Բոլոր միջոցառումներում, որտեղ պետք է հնչի ՀՀ օրհներգը, այն պետք է հնչի կենդանի կատարմամբ:
Այս մասին այսօր կառավարության նիստի ժամանակ հայտարարել է ՀՀ վարչապետ Նիկոլ Փաշինյանը։
«Մի շարք գերատեսչություններ ունեն նվագախմբեր, երգչախմբեր։ Նրանք, ովքեր չունեն նվագախմբեր կամ երգչախմբեր, թող հրավիրեն, որպեսզի նրանք կատարեն»,- ասաց Փաշինյանը:
Նրա խոսքով՝ եթե այնպիսի միջոցառում է, որտեղ օրհներգը պետք է հնչի, նշանակում է՝ այդ միջոցառումը նաև որոշակի բյուջե ունի, հետևաբար կարելի է այդ բյուջեից այլ ատրիբուդների ավելի քիչ տրամադրել և հրավիրել երգչախմբեր և նվագախմբեր։
Ըստ վարչապետի՝ սա նաև որոշակի ֆինանսական հոսքերի վերաուղղում է դեպի մշակույթի և արվեստի ճյուղեր, որպեսզի մարդիկ մշակույթի և երաժշտության զարգացման ոլորտում ևս ներդրում անեն։
