Ռուսաստանը պատրաստ է Երևանի հետ քննարկել TRIPP նախագծում Մոսկվայի հնարավոր մասնակցության պարամետրերը, «Իզվեստիա»-ին ասել է Ռուսաստանի փոխարտգործնախարար Միխայիլ Գալուզինը։
««Թրամփի ճանապարհ» նախագծի վերաբերյալ մենք պահպանել ենք մեր դիրքորոշումը։ Հայ-ամերիկյան նախաձեռնության մանրամասները դեռ պետք է ուսումնասիրվեն։ Մենք պատրաստ ենք խորհրդակցել մեր գործընկերների հետ Երևանում՝ քննարկելու ինչպես պարամետրերը, այնպես էլ Ռուսաստանի հնարավոր մասնակցությունը այս կամ այն ձևով», – հայտարարել է նա։
Գալուզինը հիշեցրել է, որ Հայաստանի երկաթուղային ցանցը մինչև 2038 թվականը կառավարվում է «Ռուսական երկաթուղիներ» ընկերության դուստր ընկերության կողմից, Հայաստանն օգտագործում է ռուսական երկաթուղային գիծը, իսկ Իրանի հետ սահմանին տեղակայված են ռուս սահմանապահներ։
«Պետք է հաշվի առնել նաև Հայաստանի անդամակցությունը ԵԱՏՄ-ին։ Այս պայմաններում պարզ է, որ մեր գործընկերները չեն կարող առանց Ռուսաստանի», – ընդգծել է փոխնախարարը։
Գալուզինը նաև նշել է, որ արդեն իսկ զգալի առաջընթաց է գրանցվել տարածաշրջանում հաղորդակցությունների ապաշրջափակման գործում՝ Ռուսաստանի, Հայաստանի և Ադրբեջանի եռակողմ ձևաչափով՝ փոխվարչապետի մակարդակով։