Սա հերթական դառն ապացույցն է այն բանի, որ Ադրբեջանն իր ներկայիս վարչակազմով Հայաստանի հետ որևէ իրական խաղաղության չի գնալու։ Հայաստանի և Ադրբեջանի բռնապետերի՝ Աբու-Դաբիում խաղաղության մրցանակ ստանալու երեկվա հանդիսության և հնչեցրած կեղծ ու շողոքորթ հայտարարությունների ֆոնին հրեշավոր այս դատավճիռները անարգանքի ցինիկ դրսևորումներ են հայության ու քաղաքակիրթ ողջ մարդկության հանդեպ։
Փաշինյանի գլխավորած վարչախումբը ևս ուղիղ հանցակից է այս խայտառակ հանգրվանին հասնելու հարցում, քանի որ Արցախի ռազմաքաղաքական ղեկավարության և մյուս քաղաքացիների պատանդառումը Արցախի դավաճանական հանձնման հետևանքով է եղել։
Պատանդառումից հետո մինչև օրս վարչախումբը ոչ մի գործուն քայլ չի կատարել մեր հայրենակիցներին ազատելու ուղղությամբ։ Ավելին՝ մենք համոզմունք ունենք, որ հայ պատանդներից ոմանց ազատազրկումը բխում է հենց այս վարչախմբի քաղաքական շահերից։
«ՀայաՔվե» ազգային քաղաքացիական միավորումը զորակցում է պատանդառված մեր հայրենակիցների ընտանիքներին և ողջ հայ ժողովրդին։ Մենք ձգտելու ենք անմիջական ազդեցություն ունենալ Հայաստանում որոշումների կայացման վրա՝ որպեսզի ի վերջո կարողանանք ազատել մեր պատանդառված հայրենակիցներին, և վերականգնենք մեր բոլորի խախտված իրավունքները: