Վաղարշապատի (Էջմիածին) նախկին քաղաքապետ Դիանա Գասպարյանը լրագրողների հետ կարճ զրույցում չի ցանկացել մեկնաբանել իր ու ընտանիքի դեմ քրեական գործերը։ Նա հերքել է իր և ՀՀ պաշտպանության նախարար Սուրեն Պապիկյանի խոսակցության հայտնի ձայնագրության ու դատական գործընթացի կապը:
«Ես դավադրապաշտական տեսությունների կողմնակից չեմ, առնվազն՝ նման ենթադրություն անելու համար որևէ հիմք կամ պատճառ չունեմ»,- նշել է նա։
Նախկին քաղաքապետն ասել է, որ ինքն էլ ունի հանրությանը հայտնելու շատ բաներ, սակայն մի քանի դատական նիստ է հարկավոր, որպեսզի տեղեկություն ունենա։
«Խոստացված մամուլի ասուլիսը կլինի, պարզապես մի քանի դատական նիստի ընթացքում որոշ բաներ պետք է պարզվեին, նոր ասուլիսը կհրավիրվի։ Բոլոր հարցերին հանգամանալից կպատասխանեմ, ես էլ շատ բան ունեմ հանրությանը ներկայացնելու»,- հայտարարել է նա։
Գասպարյանը մայիսի 15-ին հրաժարական էր տվել, ինչին նախորդել էր նրա սկեսրայրին պատկանող գազալցակայանում մարտի 22-ին տեղի ունեցած սպանությունը։ Գլխավոր դատախազությունից հուլիսի 26-ին Armenia Today-ին հաստատել էին, որ Գասպարյանի նկատմամբ Հակակոռուպցիոն կոմիտեում փողերի լվացման և պաշտոնեական լիազորությունները չարաշահելու հոդվածներով վարույթ է նախաձեռնվել։
Դեկտեմբերի 23-ին ՀՀ հակակոռուպցիոն կոմիտեում քննված քրեական վարույթով հիմնավորվել էր, որ Գասպարյանն ընտանիքի անդամների և փոխկապակցված անձանց հետ համայնքապատկան հողերը ձևական աճուրդների և ուղղակի վաճառքների միջոցով ձեռք է բերել բազմակի անգամ շուկայականից ցածր գներով։
