Սաուդյան Արաբիայի ֆուտբոլային առաջնությունում հերթական սկանդալն է հասունանում։ Ֆրանսիացի կիսապաշտպան Նգոլո Կանտեն հրաժարվել է մասնակցել «Ալ-Իթիհադի» մարզումներին՝ բողոքելով իր տրանսֆերի ձախողումից։
34-ամյա ֆուտբոլիստը մոտ էր թուրքական «Ֆեներբահչե» տեղափոխությանը, սակայն գործարքը տապալվել է «Ալ-Իթիհադի» ղեկավարության թույլ տված կոպիտ սխալների պատճառով։ Փաստաթղթային անփութությունը հանգեցրել է նրան, որ Սաուդյան Արաբիայում տրանսֆերային պատուհանը փակվել է՝ անհնարին դարձնելով Կանտեի փոխանակումը «Ֆեներբահչեի» հարձակվող Յուսեֆ էն-Նեսիրիի հետ։
Այս իրավիճակը ևս մեկ անգամ փաստում է սաուդական ֆուտբոլում, առավելապես «Ալ-Իթիհադի» ներսում, տիրող կազմակերպչական քաոսը, որն ավելի վաղ հանգեցրել էր Կարիմ Բենզեմայի դժգոհությանը և նրա տեղափոխությանը «Ալ-Հիլալ»։
Հիշեցնենք, որ «Ալ-Նասրի» և Պորտուգալիայի հավաքականի հարձակվող Կրիշտիանու Ռոնալդուն ևս հրաժարվում է մասնակցել մարզումներին և խաղերին՝ քննադատելով երկրի պետական ներդրումային հիմնադրամի (PIF) կողմից ակումբների զարգացման ուղղությամբ իրականացվող քաղաքականությունը։