Վրաստանի վարչապետ Իրակլի Կոբախիձեն հայտարարել է, որ Միջին միջանցքը, որը կապում է Արևելյան Ասիան Եվրոպայի հետ՝ Կենտրոնական Ասիայի, Կովկասի և Թուրքիայի տարածքով, ներկայիս աշխարհում դառնում է ավելի ու ավելի հազվադեպ երևույթ՝ առաջարկելով կայուն և վստահելի տարանցիկ երթուղի, որը կարող է հաղթահարել աշխարհաքաղաքական բևեռացումը։ Այս մասին Կոբախիձեն ասել է 2026 թվականի Համաշխարհային կառավարությունների գագաթնաժողովի իր ելույթի ընթացքում։
Նրա խոսքով՝ մի աշխարհում, որտեղ ավանդական երթուղիները կորցնում են իրենց վստահելիությունը, այլընտրանքային միջանցքների անհրաժեշտությունը դառնում է կենսական։
«Հարցը, որ այսօր մեր առջև է կանգնած, վերաբերում է ոչ թե այնպիսի փոփոխությանը, որն ակնհայտորեն արդեն ընթանում է, այլ այն է՝ ինչպես ենք արձագանքելու այդ փոփոխությանը։ Ինչպե՞ս ստեղծենք առևտրային համակարգ, որը բավականաչափ կայուն կլինի՝ դիմակայելու աշխարհաքաղաքական ցնցումներին, և միևնույն ժամանակ՝ բաց, որպեսզի ապահովի բարեկեցություն։
Մի աշխարհում, որտեղ ավանդական երթուղիները չեն վայելում վստահություն, այլընտրանքային միջանցքները դառնում են անհրաժեշտություն։ Տարանջատված գլոբալ տնտեսության պայմաններում՝ այն երկրները, որոնք կարող են կամրջել բևեռացումները, դառնում են անփոխարինելի։ Անորոշության դարաշրջանում հենց կայունությունն է վերածվում ռազմավարական ակտիվի։ Աշխարհին պետք է ավելի դիմակայուն առևտուր։ Անհրաժեշտ չէ ապամեկուսացում, այլ՝ խելացի դիվերսիֆիկացում։ Կարիք չկա քաղաքական կողմնորոշման՝ աշխարհին պետք են վստահելի կապող կամուրջներ։
Այս ամենը մեզ բերում է Միջին միջանցքի գաղափարին, որն այլևս պարզապես տարբերակ չէ, այլ դարձել է գլոբալ առևտրի անբաժանելի պայման։ Միջանցք, որը կապում է Արևելյան Ասիան Եվրոպայի հետ Կենտրոնական Ասիայի, Կովկասի և Թուրքիայի տարածքով՝ առաջարկելով կայուն և վստահելի տարանցիկ երթուղի, որն ունակ է հաղթահարելու աշխարհաքաղաքական բաժանարար գծերը»,– ընդգծել է Վրաստանի վարչապետը։