ՏԿԵ նախարար Դավիթ Խուդաթյանը տեղեկացրել է, որ նոր ատոմակայանի կառուցման մասին կարևոր որոշում են ընդունել. «Ատոմակայանի տիպը պիտի լինի մոդուլային: Շարունակել ենք ուսումնասիրել մեզ տրվող առաջարկներն այդ մասով, մասնավորապես, և՛ ՌԴ-ի, և՛ ԱՄՆ-ի, և՛ Չինաստանի, և՛ Կորեայի, և՛ Ֆրանսիայի մասով, բայց մոդելի ընտրության հետ կապված վերջնական որոշում չունենք․ մոդելի ընտրության հարցը կիրականացվի 2026 կամ 2027 թվականին: Շտապելու անհրաժեշտություն չունենք:
Կախված մոդելի ընտրությունից՝ կորոշվի նաև, թե որ երկրի հետ ենք իրականացնում աշխատանքը, որովհետև մոդուլային ատոմակայանի սիստեմը, որպես այդպիսին, լայնորեն տարածված չի եղել նախկինում, և լրացուցիչ ուսումնասիրելու անհրաժեշտություն կա, ինչը անում ենք»։
Ինչ վերաբերում է գործող ատոմակայանին, Խուդաթյանն ասել է, որ ծրագիր կա, որը հնարավորություն կտա ևս 10 տարով երկարաձգել ատոմակայանի շահագործման ժամկետը. «Մենք գնում ենք հետևողական երկարացման ուղղությամբ, և վստահ ենք, որ երկարացման ծրագիրը կհաջողվի, և առաջիկա 10 տարվա ընթացքում ատոմակայանը կշարունակի միացված մնալ մեր էներգահամակարգին»,- ասել է նա։
Խուդաթյանի խոսքով՝ ապրիլից, մեծ հավանականությամբ, Հայկական ատոմակայանը 5 ամսով դուրս կգա էներգահամակարգից․ «Բայց նաև, հաշվի առնելով այլ հզորությունների գոյությունը, որոնք օգտագործում ենք ոչ ամբողջական ծավալով, մեր էներգետիկ համակարգում խնդիրներ և պրոբլեմներ չեն առաջանա»: