Երևանում փետրվարի 14-15-ին կանցկացվի գրքի և կրթության ԿարդաLove հինգերորդ փառատոնը։
Փառատոնի շրջանակում նախատեսված են կրթական ցուցահանդես, գրքերի մեծածավալ ցուցահանդես-վաճառք, ինչպես նաև գրական, կրթական և մշակութային միջոցառումներ։ Կազմակերպիչների խոսքերով՝ ծրագիրը ներառում է առաջարկներ տարբեր տարիքային խմբերի համար՝ նախադպրոցականներից մինչև մեծահասակներ։
«Կրթությունը չունի վաղեմության ժամկետ»,- նշվում է հաղորդագրությունում։
Կրթական ցուցահանդեսին կմասնակցեն մանկապարտեզներ և զարգացման կենտրոններ, դպրոցներ, քոլեջներ և համալսարաններ, լեզվական ու թրեյնինգային կենտրոններ, ինչպես նաև մասնագիտական վերապատրաստում իրականացնող կազմակերպություններ։
Այցելուները հնարավորություն կունենան ձեռք բերել հայկական հրատարակիչների գրքեր՝ մինչև 50% զեղչով, մասնակցել բեսթսելլերների շնորհանդեսների, գրական հանդիպումների և քննարկումների, ինչպես նաև ինտելեկտուալ խաղերի ու մրցույթների։
Փառատոնը կանցկացվի Elite Plaza բիզնես կենտրոնում։ Բաց է նաև գրանցումը կրթական ցուցահանդեսին՝ տաղավարով մասնակցելու համար։
