Իրանի գերագույն առաջնորդի որդին՝ Մոջթաբա Խամենեին, վերջին տարիներին կառուցել է միջազգային ներդրումային «կայսրություն»։ Այս մասին հայտնել է Bloomberg-ը՝ հղում անելով աղբյուրներին և առաջատար արևմտյան հետախուզական գործակալության գնահատականին։
Հրապարակման համաձայն՝ 56-ամյա հոգևորականը, որը գովազդվում է որպես այաթոլլա Ալի Խամենեիի հավանական իրավահաջորդ, վերահսկում է արտասահմանում ակտիվների հսկայական պորտֆել, չնայած նա պաշտոնապես դրանք չի գրանցում իր անունով։ Աղբյուրները պնդում են, որ Մոջթաբա Խամենեին անմիջականորեն ներգրավված է եղել ներդրումային գործարքներում, որոնցից մի քանիսը թվագրվում են առնվազն 2011 թվականից։
Ֆինանսական կայսրությունը ներառում է ակտիվների լայն շրջանակ՝ Պարսից ծոցում նավագնացության բիզնեսից մինչև շվեյցարական բանկային հաշիվներ և անշարժ գույք Բրիտանիայում, որոնց արժեքը գերազանցում է 100 միլիոն ֆունտ ստեռլինգը։
Մասնավորապես, դրանք ներառում են Լոնդոնի հեղինակավոր թաղամասերում գտնվող շքեղ անշարժ գույք, այդ թվում՝ 2014 թվականին 33.7 միլիոն ֆունտ ստեռլինգով գնված տուն, Դուբայի տարածքում գտնվող վիլլա, որը հայտնի է որպես «Դուբայի Բևեռլի Հիլզ», և շքեղ հյուրանոցներ մի շարք եվրոպական քաղաքներում՝ Ֆրանկֆուրտից մինչև Մալյորկա։
Bloomberg-ի կողմից ուսումնասիրված փաստաթղթերի և աղբյուրների համաձայն, այս գործարքների ֆինանսական հոսքերը կատարվել են Բրիտանիայում, Շվեյցարիայում, Լիխտենշտեյնում և ԱՄԷ-ում գտնվող բանկային հաշիվների միջոցով: Նրանց խոսքով՝ միջոցների հիմնական աղբյուրը իրանական նավթի վաճառքից ստացված եկամուտն է եղել։
Այնուամենայնիվ, ուսումնասիրված փաստաթղթերից ոչ մեկը ուղղակիորեն չի թվարկում Մոջթաբա Խամենեիի անունով ակտիվները: Գույքի զգալի մասը գրանցված է իրանցի գործարար Ալի Անսարիի անունով, որի նկատմամբ Բրիտանիան պատժամիջոցներ է կիրառել անցյալ տարվա հոկտեմբերին։
Իրանական պետական լրատվամիջոցները ավանդաբար Գերագույն առաջնորդին և նրա ընտանիքին ներկայացնում են որպես մարդիկ, որոնք վարում են համեստ և բարեպաշտ կյանք՝ համապատասխանելով 1979 թվականի Իսլամական հեղափոխության իդեալներին: Սակայն, ինչպես նշում է Bloomberg-ը, Գերագույն առաջնորդի որդու գաղտնի հարստությունը հակասում է այս պատկերին, հատկապես երկրում աղքատության աճի և լայնածավալ բողոքի ցույցերի և սոցիալական անկարգությունների ֆոնին: