Տասը քաղաքացի հոսպիտալացվել է Թալին–Բազմաբերդ ճանապարհին գրանցված շղթայական ավտովթարի հետևանքով

ԵՐԵՎԱՆ, 27 հունվարի․/Նովոստի–Արմենիա/․ Այսօր Թալին–Բազմաբերդ ճանապարհին գրանցված շղթայական վթարի հետևանքով հոսպիտալացվել է 10 քաղաքացի։

Այս մասին հայտնել է առողջապահության նախարար Անահիտ Ավանեսյանը։ 

«Հանրապետական շտապօգնության ծառայության Արագածոտնի մարզային կայանի բրիգադներն այսօր առավոտից աշխատում են գերծանրաբեռնված՝ օպերատիվ բուժօգնություն տրամադրելով Թալին-Բազմաբերդ ավտոճանապարհին տեղի ունեցած շղթայական վթարից տուժածներին», – գրել է Ավանեսյանը Facebook–յան իր էջում։

Նրա խոսքով, 10 քաղաքացի հոսպիտալացվել է մարզային և երևանյան բուժկենտրոններում.հիմա բուժզննման փուլում են, կան ծանր դեպքեր: 

«Եվս մեկ անգամ հորդորում եմ` պահպանեք անվտանգության կանոնները. պարտադիր ամրակապվեք, մինչև 7 տ երեխաների դեպքում` օգտագործեք car seat», – գրել է Ավանեսյանը։ 

Այսօր ավելի վաղ Փրկարար ծառայությունը հայտնել է, որ Երևան–Գյումրի ճանապարհին 15 մեքենա է բախվել։