Սիդնեյի հիվանդանոցներից մեկում մահացել է 12-ամյա Նիկո Անտիչը, ով ծանր վնասվածքներ էր ստացել Սիդնեյի նավահանգստում՝ շնաձկան հարձակման հետևանքով։ Միջադեպը տեղի էր ունեցել Վոկլյուզ արվարձանում, որը գտնվում է քաղաքի կենտրոնից ընդամենը 9 կիլոմետր հեռավորության վրա։
Ըստ ականատեսների և ոստիկանության հաղորդագրության՝ Նիկոն ընկերների հետ ժայռից ջուրն էր թռչում, երբ ենթարկվել է գիշատչի հարձակմանը։ Շնաձուկը պատանուն հասցրել է երկու ոտքերի խորը վերքեր։ Ընկերներին հաջողվել է տղային դուրս բերել ափ և ահազանգել շտապօգնության ծառայությանը, սակայն բժիշկներին չի հաջողվել փրկել նրա կյանքը՝ արյան մեծ կորստի պատճառով։
Ծնողները պաշտոնական հայտարարության մեջ իրենց որդուն նկարագրել են որպես «կյանքով լի, մարզասեր և բարեկամական» անհատականություն։
Այս ողբերգությունը վերջին երկու օրվա ընթացքում Նոր Հարավային Ուելսի ափերին գրանցված չորս հարձակումներից մեկն է։
,
Փորձագետները նշում են, որ վերջին շրջանի տեղատարափ անձրևները ստեղծել են այսպես կոչված «իդեալական փոթորկի» պայմաններ։ Անձրևաջրերը ջուրն են լցնում տիղմ և սննդարար նյութեր, ինչը գրավում է շնաձկներին։ Սննդի առատությունը գիշատիչներին ստիպում է ավելի մոտ գալ ափին՝ որս անելու համար։Անցած շաբաթվա ընթացքում Ավստրալիայի արևելյան ափին արձանագրվել են ևս մի քանի միջադեպեր.
Սիդնեյի հյուսիսային լողափերում մարզիկին հաջողվել է անվնաս դուրս գալ ջրից։
27-ամյա տղամարդը և 39-ամյա սերֆինգիստը ստացել են կյանքի համար վտանգավոր վնասվածքներ տարբեր ափամերձ գոտիներում։
Իշխանությունները ժամանակավորապես փակել էին քաղաքի բոլոր լողափերը։ Թեև դրանց մեծ մասն արդեն վերաբացվել է Ավստրալիայի օրվան նվիրված տոնական օրերին, փրկարարները հորդորում են քաղաքացիներին ցուցաբերել առավելագույն զգոնություն։