Մեծ Բրիտանիայի վարչապետ Քիր Սթարմերը և ԱՄՆ նախագահ Դոնալդ Թրամփը համաձայնության են եկել Ուկրաինայում երկարաժամկետ հրադադարի ուղղությամբ շարժվելու անհրաժեշտության հարցում։ Այս մասին ասվում է վարչապետի գրասենյակի կողմից ԱՄՆ առաջնորդի հետ հեռախոսազրույցից հետո տարածված հայտարարության մեջ։
«Առաջնորդները համաձայնության են եկել կայուն հրադադարի ուղղությամբ առաջընթաց գրանցելու անհրաժեշտության հարցում։ Մինչ դիվանագիտական ջանքերը շարունակվում են, վարչապետը կրկին նշել է, որ միջազգային գործընկերները պետք է շարունակեն աջակցել Ուկրաինային իր պաշտպանության գործում», – նշվում է հաղորդագրության մեջ։
Քննարկումը կենտրոնացած է եղել նաև «Արկտիկայում անվտանգությունն ամրապնդելու անհրաժեշտության» վրա, որը Սթարմերը անվանել է «իր կառավարության համար բացարձակ առաջնահերթություն»։
Մեծ Բրիտանիայի վարչապետը նաև անդրադարձել է Թրամփի կողմից Աֆղանստանում ՆԱՏՕ-ի զորքերի մասին արված «նսեմացնող» դիտողություններին։
«Վարչապետը բարձր է գնահատել Աֆղանստանում կողք կողքի կռված բրիտանական և ամերիկյան զորքերի քաջությունն ու հերոսությունը, որոնցից շատերը երբեք տուն չեն վերադարձել։ Նա ասել է, որ մենք երբեք չպետք է մոռանանք նրանց զոհաբերությունը», – ասվում է հայտարարության մեջ։
Ավելի վաղ՝ Fox News-ին տված հարցազրույցում Թրամփը նվազեցրել է Արևմտյան Եվրոպայի երկրների դերը Աֆղանստանում ռազմական արշավում։ Նա ասել է, որ եվրոպական դաշնակից զորքերը «հեռու են մնացել առաջնագծից»։ Սա վրդովմունք առաջացրեց Մեծ Բրիտանիայում, որը կորցրել է 457 զինծառայողի, որոնք զոհվել են Աֆղանստանում։