Ադրբեջանական գերությունից վերադարձած լիբանանահայ Վիգեն Էուլջեքչյանը հիմա երջանիկ է, սակայն առողջական խնդիրներ ունի, չի կարողանում նորմալ քնել, Pastinfo-ի հետ զրույցում պատմել է նրա կինը՝ Լինդա Էուլջեքչյանը:
Նրա խոսքով՝ Վիգենի մի ականջը չի լսում, բացի այդ խնդիր ունի մեջքի հատվածում, չի կարողանում առանց կորսետի քայլել:
«Մեջքը, ականջներն են, երբ էյֆորիան անցնի, պիտի հասկանանք, թե ինչ խնդիրների առաջ ենք կանգնած», – ասել է կինը՝ նշելով, որ նկատի ունի հոգեկան առողջությունը, որին կարող է հարված հասցված լինել գերության ընթացում:
Ըստ Լինդա Էուլջեքչյանի՝ ամուսինը փորձում է բնական երևալ, բայց մինչև հիմա չի կարողանում աչք փակել, քնել, իսկ երբ մենակ է լինում, լալիս է, քանի որ այդպես էլ չկարողացավ տեսնել մորն ու վերջին հրաժեշտը տալ նրան:
«Բայց հույս ունենք, որ այդ դժվարություններն էլ կհաղթահարի», – նշել է նա:
Վերջինս պատմել է նաև, որ Էուլջեքչյանը ադրբեջանական գերության մեջ չորրորդ անգամ էր հացադուլ հայտարարել՝ պահանջելով հնարավորություն տալ մասնակցելու որդու հարսանիքին, սակայն ինքն այդ մասին տեղյակ չի եղել:
Էուլջեքչյանի փոխանցմամբ՝ ամուսինը սկզբում չի հավատացել ազատ արձակման լուրին. «Մտածել է, որ հնարավոր է իրեն խաբում են՝ հացադուլից դուրս բերելու համար։ Նրան բացատրել են, որ պետք է սնվի, որպեսզի կարողանա դիմանալ, նրան ասել են, որ պետք է ուտես, որպեսզի կարողանաս դուրս գալ: Ասել է՝ «մինչև չհասնեմ Երևան, չեմ հավատա, որ ազատ եմ»»։
Լիբանանահայ տղամարդը բերման էր ենթարկվել 2020 թվականի նոյեմբերի 10-ին Շուշիում՝ արցախյան 44-օրյա պատերազմի մարտական գործողությունների ավարտի հաջորդ օրը: 2021 թվականի հունիսի 14-ին Բաքվի զինվորական դատարանը նրան դատապարտել էր 20 տարվա ազատազրկման՝ «վարձկանության» և «ահաբեկչության» մեղադրանքներով:
Լինդա Էուլջեքչյանը հավելել է, որ բոլոր մեղադրանքն վճիռներն անարդար էին, և ամբողջ աշխարհը դա գիտի:
Ադրբեջանը հունվարի 14-ին Հայաստանին էր վերադարձրել չորս գերու՝ Գևորգ Սուջյանին, Դավիթ Դավթյանին, Էուլջեքչյանին և Վագիֆ Խաչատրյանին։
