Ոսկետափի հոգեւոր հովիվ Տեր Արտաշես քահանա Հակոբյանը դուրս չի գալու եկեղեցուց։ Այս մասին նա ասաց NEWS.am-ի հետ զրույցում։
«Եկել են, սպառնացել, որ գալու են ու կողպեքը կոտրեն, բանալիները փոխեն, բայց ես եկեղեցուց դուրս չեմ գալու։ Իրենց ասելով՝ իրենք մարդ ունեն այստեղ նշանակած, թե ով է նշանակել, ում է նշանակել, ինձ հայտնի չէ, բայց ինձ այստեղ նշանակել են Մայր Աթոռից ու ես շարունակելու եմ իմ հոգեւոր ծառայությունը»,– ասաց Տեր Արտաշեսը։
Ըստ Մասյացոտնի թեմի, այսօր Ոսկետափ բնակավայրի վարչական ղեկավար Նշան Հովհաննիսյանը և Սուրբ Սահակ–Մեսրոպ եկեղեցու կառուցման հովանավոր Համլետ Գորոյանն այցելել են եկեղեցի և հոգևոր հովիվ Տեր Արտաշես քահանա Հակոբյանից պահանջել են ազատել եկեղեցին։ Նրանք նաև հայտնել են, որ մեկ ժամ անց վերադառնալու են՝ եկեղեցու մուտքի դռների բանալիները փոխելու նպատակով։