ԱԺ պատգամավորների նախաձեռնությամբ այսօր արտահերթ նիստ է հրավիրվել, որի օրակարգում մեկ հարց է՝ ՀՀ Ընտրական օրենսգիրք սահմանադրական օրենքում փոփոխություններ և լրացումներ կատարելու մասին օրենքի նախագիծը:
ԱԺ նախագահ Ալեն Սիմոնյանը հայտնեց՝ արտահերթ նիստը նախաձեռնող պատգամավորները ներկայացրել են Ազգային ժողովի արտահերթ նիստի օրակարգային հարցի քննարկման հատուկ ընթացակարգի մասին ԱԺ որոշման նախագիծ, որով առաջարկվում է նախագծի երկրորդ ընթերցմամբ քննարկումը կազմակերպել առաջին ընթերցմամբ ընդունելուց հետո՝ 24-ժամվա ընթացքում:
«Այս որոշման նախագիծը նախ՝ պետք է քննարկենք, այնուհետև քվեարկենք»,- հայտնեց Սիմոնյանը:
Որոշման նախագիծը ներկայացրեց արտահերթ նիստը նախաձեռնող պատգամավորների ներկայացուցիչ Արուսյակ Ջուլհակյանը:
«Դիտորդական առաքելությունները ընտրական գործընթացում ներգրավվում են որպես հանրային վերահսկողություն իրականացնող սուբյեկտներ, որոնц հիմնական առաքելությունն է ընտրական գործընթացի անկախ, օբյեկտիվ և անաչառ գնահատումը:
Այդ նպատակի իրագործումը հնարավոր է միայն այն պայմաններում, երբ դիտորդական առաքելությունները և դիտորդները գործում են քաղաքականապես չեզոք և անաչառ: Գործող ՀՀ ընտրական օրենսգիրքը չի սահմանում բավարար և արդյունավետ իրավական մեխանիզմներ դիտորդական առաքելությունների և դիտորդների կողմից քաղաքական չեզոքության և անկողմնակալության պարտականության պատճաշ կատարման վերահսկումը և ապահովումը երաշխավորելու համար»,- հայտնեց Ջուլհակյանը:
Նրա խոսքով՝ ներկայացված օրենսդրական նախաձեռնությունը միտված է նշված բացի շտկմանը, ընտրական գործընթացների նկատմամբ չեզոքության, թափանցիկության և իրավական կանխատեսելիության ամրապնդմանը:
Ջուլհակյանն ընդգծեց՝ նախագծի ընդունումը հրատապ է՝ հաշվի առնելով այն հանգամանքը, որ առաջիկայում մեզ սպասվում են ընտրական գործընթացներ և դրանց նկատմամբ հանրային և միջազգային ուշադրության բարձր մակարդակ կա: