ՀՀ սփյուռքի գործերի գլխավոր հանձնակատար Զարեհ Սինանյանն այսօր հրաժարվեց պատասխանել այն հարցին, թե ինչպես է ծախսել իր ստացածխոշոր պարգևավճարը։
«Ի՞նչ հարց է, այսի՞նքն»,- արձագանքեց նա՝ ի պխատասխան լրագրողների դիտարկմանը, որ դա հանրային հաշվետվողականության պահանջ է, և քաղաքացիներն իրավունքն ունեն իմանալ, թե իրենց հարկերի հաշվին պարգևավճար ստացած պաշտոնյան ինչպես է ծախսում այդ գումարները։
«Հա, պետծառայողներն, ըստ ձեզ, հաշվետու են, թե իրենք ինչի վրա են ծախսում… անլուրջ եք, դուք պատկերացում չունեք։ Հարց տվեք, բայց նորմալ հարց»,- ասաց նա։
Հարցին՝ արդա՞ր էր, որ համատարած աղքատության ֆոնին պետական պաշտոնյաները նման բարձր պարգևավճարներ են ստանում, Սինանյանը պատասխանեց՝ որոշողն է որոշել՝ արդար է, թե ոչ։
Իսկ մտածե՞լ է բարեգործություն անել, այդպիսով ժողովրդին հատուցել այն բանի համար, որ այժմ բարձր պաշտոն է զբաղեցնում։
«Բովանդակային հարց կարո՞ղ եք տալ։ Չէ, կլոունադայով չեմ զբաղվի»,- ասաց նա։
Դիտարկմանը, որ հանրությունն իրավունք ունի իմանալու՝ ինչպես են ծախսվում իր հարկերից գոյացած պարգևավճարները, Սինանյանը նախ հայտարարեց՝ լրագրողները հանրություն չեն և հանրության հետ կապ չունեն։
«Հանրության անունից մի խոսեք։ Իմ մայրն էլ է հանրություն, և ինքը չի ուզում իմանալ։ Փորձում եք թատրոն անել, կլոունադա անել. չեմ մասնակցելու։ Բովանդակային հարց ունե՞ք սփյուռքից, Իրանից, Սիրիայից»,- ասաց նա և հեռացավ։