«Մանչեսթեր Յունայթեդի» նախկին ֆուտբոլիստ Անդրեյ Կանչելսկիսը «РБ Спорт»-ի հետ զրույցում կարծիք է հայտնել «Կրասնոդարի» կիսապաշտպան Էդուարդ Սպերցյանի հեռանկարների մասին՝ նշելով, որ հայ ֆուտբոլիստը կարող էր ուժեղացնել անգլիական ակումբը։
Նշենք, որ Ռուսաստանի Պրեմիեր լիգայի 18 տուրից հետո Սպերցյանը մրցաշարի լավագույն ասիստենտն է՝ իր ակտիվում ունենալով 12 գոլային փոխանցում։
«Բոլորը խոսում են, թե Սպերցյանը ուր որ է կմեկնի Եվրոպա, բայց չգիտես ինչու՝ դեռ չի մեկնում։ Այս պահին Էդուարդը կօգներ «Մանչեսթեր Յունայթեդին»։ Ակումբում ֆուտբոլիստների հետ կապված ծանր իրավիճակ է։ Չեմ ասի, թե Սպերցյանն ավելի ուժեղ է Բրունո Ֆերնանդեշից, բայց նա հաստատ պետք կգար ՄՅՈւ-ին»։
Պատասխանելով այն հարցին, թե արդյոք Սպերցյանը համապատասխանում է «Մանչեսթեր Յունայթեդի» հիմնական կազմի մակարդակին, նախկին ֆուտբոլիստը նշել է․
«Նա հաստատ չէր փչացնի ընդհանուր պատկերը։ Էդուարդը հիմնական կազմում տեղ զբաղեցնելու խնդիր չէր ունենա»։
Էդուարդ Սպերցյանի պայմանագիրը «Կրասնոդարի» հետ նախատեսված է մինչև 2029 թվականի հունիսը։
Transfermarkt պորտալը կիսապաշտպանի տրանսֆերային արժեքը գնահատում է 25 մլն եվրո։