Հայաստանում հունվարի 27–ը, հնարավոր է, դառնա ոչ աշխատանքային օր
ԵՐԵՎԱՆ, 19 հունվարի․/Նովոստի–Արմենիա/․ Հայաստանում հունվարի 27–ը, հնարավոր է, դառնա ոչ աշխատանքային օր։
ԱԺ-ն այսօր քննարկում է «Հայաստանի Հանրապետության տոների և հիշատակի օրերի մասին» օրենքում լրացում կատարելու մասին օրենքի նախագիծը երկրորդ ընթերցմամբ և ամբողջությամբ ընդունելու հարցը։
Նախագծով առաջարկվում է հունվարի 27-ը սահմանել որպես Հայրենիքի պաշտպանության համար զոհվածների հիշատակի օր, և այդ օրը սահմանել ոչ աշխատանքային։
ԱԺ փոխնախագահ Ռուբեն Ռուբինյանի խոսքով՝ նախագիծը հիմնված է «Հայրենիքի պաշտպանության համար զոհվածների հիշատակը հավերժացնելու մասին» 2000 թվականի օրենքի վրա, որը սահմանում է, որ հայրենիքի պաշտպանության համար զոհվածների հիշատակի հավերժացման հիմնական ձևերից մեկը հիշարժան օրերի և համապետական հիշատակի օրվա ընդունումն է։
Հիշատակի օրն առաջարկվում է նշել հունվարի 27-ին, որպեսզի այն կապ չունենա որևէ կոնկրետ իրադարձության հետ, բայց լինի օր, որը որոշակի խորհուրդ կունենա իր մեջ։
«Այսպիսով մենք հունվարի 27-ին կհիշենք և կխոնարհվենք հայրենիքի պաշտպանության համար զոհվածների առաջ, իսկ հունվարի 28-ին՝ որպես շարունակվող կյանքի խորհրդանիշ, կտոնենենք բանակի օրը», – նշել է Ռուբինյանը։
Նշենք, որ նախագիծը հաստատվելուց հետո օրենքն ուժի մեջ կմտնի պաշտոնական հրապարակման օրն անմիջապես, և այս հունվարի 27-ը կլինի ոչ աշխատանքային օր։