«Մեր Ձևով» շարժման համակարգող Նարեկ Կարապետյանը հայտարարել է, որ «Քաղաքացիական պայմանագիր» խմբակցության անդամներն աննախադեպ հետևողականությամբ են պաշտպանում վարչապետ Նիկոլ Փաշինյանի աշխատավարձի ու պարգևավճարների հարցը։
Նա իշխանություններին հորդորել է նախ լուծել աղքատության խնդիրը, ապա միայն մտածել հավելավճարների մասին։
«1 դրամ աշխատավարձն արդար հատուցում է այն երկրի ղեկավարի համար, որտեղ 500,000 աղքատ մարդ կա։ Դա անգամ շատ է», — նշել է Կարապետյանը։
Որպես օրինակ նա մատնանշել է հոր՝ ԱԺ նախկին պատգամավոր Կարեն Կարապետյանի փորձը, ով տարիներ շարունակ իր աշխատավարձը փոխանցել է մանկատների սաներին՝ որպես օժանդակություն կյանքի մեկնարկի համար։
Կարապետյանի համոզմամբ՝ երկրի ղեկավարները պետք է առաջնորդվեն հենց այս սկզբունքով։
Մալաթիա-Սեբաստիա վարչական շրջանում նոր գրասենյակի բացման ժամանակ նա անդրադարձել է նաև տնտեսական խնդիրներին՝ առաջարկելով ընդհանրապես չհարկել փոքր բիզնեսը։
Ըստ նրա տվյալների՝ թեև փոքր բիզնեսը կազմում է հարկատուների ավելի քան կեսը (շուրջ 60 հազար ընկերություն), դրա մասնաբաժինը բյուջեի եկամուտներում կազմում է ընդամենը 2 տոկոս։
Կարապետյանի պնդմամբ՝ գործող հարկային բեռը խոչընդոտում է փոքր ձեռնարկությունների զարգացմանն ու դրանց վերափոխմանը միջին բիզնեսի։
