Քաղաքականություն
16.01.2026 | 17:36
Թեհրանում Թուրքիայի դեսպանատունը կոչ է արել Իրան մեկնել ծրագրող, ինչպես նաև երկրում արդեն գտնվող իր քաղաքացիներին՝ զգույշ լինել շարունակվող անկարգությունների պատճառով, գրում Turkiye today-ը։
Սոցիալական ցանցերում հրապարակված հայտարարության մեջ դեսպանատունը նշել է, որ «Իրան մեկնել ծրագրող Թուրքիայի քաղաքացիները պետք է հաշվի առնեն վերջին զարգացումները»։ Հայտարարության մեջ նաև քաղաքացիներին խորհուրդ է տրվում ուշադիր հետևել պաշտոնական հայտարարություններին՝ Թուրքիայի արտաքին գործերի նախարարության և Իրանում Թուրքիայի դիվանագիտական առաքելությունների կայքերի և սոցիալական ցանցերի միջոցով։
Դեսպանատունը նշել է, որ արտակարգ իրավիճակների դեպքում Թուրքիայի քաղաքացիները կարող են շուրջօրյա կապ հաստատել հյուպատոսական կենտրոնի և Իրանում Թուրքիայի ներկայացուցչությունների հետ։
Իրանը դեկտեմբերի 28-ից ի վեր համակված է բողոքի ցույցերով, երբ Թեհրանի առևտրային թաղամասերի վաճառականներն ու փոքր բիզնեսի սեփականատերերը գործադուլներ կազմակերպեցին՝ կտրուկ գնաճի, ազգային արժույթի փլուզման և տնտեսական պայմանների վատթարացման պատճառով։
Ցույցերը հետագայում վերածվեցին համազգային հակակառավարական բողոքի ակցիաների, որոնց մասնակցում են աշխատողներ, ուսանողներ և հասարակության այլ խմբեր մի շարք քաղաքներում։
Հունվարի 8-ին Թեհրանում անկարգությունների սրումից հետո Իրանի իշխանություններն ինտերնետի հասանելիության սահմանափակումներ են մտցրել ամբողջ երկրում։
Թարգմանությունը՝ Էմմա Չոբանյանի