14 հունվարի 2026 – 18:05 AMT
PanARMENIAN.Net – ՀՀ հանրային ծառայությունները կարգավորող հանձնաժողովը (ՀԾԿՀ) հունվարի 14-ին կայացած իր առաջին նիստում մերժել է «Վեոլիա Ջուր» ՓԲԸ-ի կողմից ներկայացված վարչական բողոքը։
«Վեոլիա Ջուր» ընկերությանը 2025 թվականի սեպտեմբերի 30-ին Հանձնաժողովը տուգանել էր 10 միլիոն ՀՀ դրամով՝ խմելու ջրի մատակարարման և ջրահեռացման ծառայությունների մատուցման կանոնների 136-րդ կետի խախտման համար։ Խոսքը վերաբերում էր Կոտայքի մարզի Սարալանջ գյուղի երաշխավորված ջրամատակարարման գրաֆիկի չպահպանմանը, որը նաև ճիշտ ձևով չէր հրապարակվել ընկերության պաշտոնական կայքում։
ՀԾԿՀ կողմից իրականացված դիտարկումներով, տեսագրություններով և «Վեոլիա Ջուր»-ի կողմից ներկայացված գրություններով հաստատվել է, որ ջրամատակարարման գրաֆիկը իսկապես խախտվել է։ Այդ իսկ պատճառով հանձնաժողովը միաձայն քվեարկությամբ մերժել է ընկերության բողոքը և թողել է տուգանման նախորդ որոշումը ուժի մեջ։