Թեհրանը զգուշացրել է ԱՄՆ զորքերը հյուրընկալող հարևաններին, որ կհարվածի ամերիկյան բազաներին, եթե Վաշինգտոնը հարված հասցնի։ Reuters-ին այս մասին ասել է իրանցի բարձրաստիճան պաշտոնյան՝ հավելելով, որ Իրանը փորձում է կանխել ԱՄՆ նախագահ Դոնալդ Թրամփի միջամտության սպառնալիքները։
Թրամփը բազմիցս սպառնացել է միջամտել՝ ի պաշտպանություն Իրանում ցուցարարների, որտեղ իրավապաշտպան խումբը հայտարարել է 2600 զոհի մասին բողոքի ամենամեծ ալիքներից մեկի ճնշման ժամանակ։ Իսրայելական գնահատականի համաձայն՝ Թրամփը որոշել է միջամտել, չնայած այս գործողության շրջանակը և ժամկետները դեռևս անհայտ են, ասել է իսրայելցի պաշտոնյան։
Երեք դիվանագետներ ասել են, որ որոշ անձնակազմի խորհուրդ է տրվել լքել Կատարի ԱՄՆ ռազմական Ալ Ուդեյդ ավիաբազան մինչև չորեքշաբթի երեկո։ Դիվանագետներից մեկն այս քայլը նկարագրել է որպես «դիրքի փոփոխություն», այլ ոչ թե «հրահանգված տարհանում»։ Զորքերի լայնածավալ տեղափոխման որևէ նշան չի եղել բազայից մոտակա ֆուտբոլային մարզադաշտ և առևտրի կենտրոն, ինչպես տեղի է ունեցել անցյալ տարի՝ Իրանի կողմից բազան հրթիռներով թիրախավորելուց մի քանի ժամ առաջ՝ ի պատասխան ԱՄՆ-ի կողմից իրանական միջուկային օբյեկտների վրա ավիահարվածների։
Դոհայում ԱՄՆ դեսպանատունը որևէ մեկնաբանություն չի արել, իսկ Կատարի արտաքին գործերի նախարարությունն անմիջապես չի արձագանքել մեկնաբանության խնդրանքին։
Իրանի իշխանությունները մեղադրել են Միացյալ Նահանգներին և Իսրայելին անկարգություններ հրահրելու մեջ, որոնց կազմակերպիչներին նրանք անվանում են ահաբեկիչներ։
Թրամփն օրեր շարունակ բացահայտորեն սպառնում է միջամտել Իրանի գործերին, չնայած մանրամասներ չի հայտնել։
Երեքշաբթի CBS News-ին տված հարցազրույցում նա խոստացել է «շատ ուժեղ գործողություններ», եթե Իրանը մահապատժի ենթարկի ցուցարարներին։ Նա նաև կոչ է արել իրանցիներին շարունակել բողոքի ցույցերը և ստանձնել ինստիտուտների վերահսկողությունը՝ հայտարարելով, որ «օգնությունը ճանապարհին է»։
Իրանցի բարձրաստիճան պաշտոնյան, որը խոսել է անանունության պայմանով, ասել է, որ Թեհրանը խնդրել է տարածաշրջանում ԱՄՆ դաշնակիցներին՝ «կանխել Վաշինգտոնի հարձակումը Իրանի վրա»։
«Թեհրանը տարածաշրջանի երկրներին՝ Սաուդյան Արաբիայից և ԱՄԷ-ից մինչև Թուրքիա, ասել է, որ այդ երկրներում գտնվող ԱՄՆ բազաները կենթարկվեն հարձակման, եթե ԱՄՆ-ն թիրախավորի Իրանը»,- ասել է պաշտոնյան։
Նա հավելել է, որ Իրանի արտաքին գործերի նախարար Աբբաս Արաղչիի և ԱՄՆ հատուկ դեսպանորդ Սթիվ Ուիթկոֆի միջև ուղիղ շփումները կասեցվել են։
Միացյալ Նահանգներն ուժեր ունի տարածաշրջանում, այդ թվում՝ Կատարի Ալ Ուդեյդում գտնվող Կենտրոնական հրամանատարության առաջնային շտաբը և Բահրեյնում գտնվող ԱՄՆ ռազմածովային ուժերի հինգերորդ նավատորմի շտաբը։
Ֆրանսիայի արտաքին գործերի նախարար Ժան-Նոել Բարրոն էլ ասել է, թե կասկածում է, որ «սա Իրանի ժամանակակից պատմության մեջ ամենադաժան ճնշումն է, և որ այն պետք է անպայման դադարեցվի»։
Արևմտյան մի պաշտոնյա ասել է, թե չի թվում, որ Իրանի կառավարությունը կանգնած է անխուսափելի փլուզման առջև, և նրա անվտանգության ապարատը շարունակում է վերահսկողություն պահպանել։ Պաշտոնյան հավելել է, որ ճնշումները վերականգնել են որոշակի հանգստություն, չնայած իշխանությունները տուժել են։
Անկարգությունները տեղի են ունեցել վերջին ժամանակներում աննախադեպ մակարդակով՝ կառավարությանը անակնկալի բերելով հատկապես խոցելիության պահին, հավելել է արևմտյան պաշտոնյան։
Թարգմանությունը՝ Էմմա Չոբանյանի