13 հունվարի 2026 – 17:10 AMT
PanARMENIAN.Net – ՀՀ նախկին գլխավոր դատախազ և Քննչական կոմիտեի նախկին նախագահ Աղվան Հովսեփյանի նկատմամբ սահմանված 100 միլիոն դրամ գրավը նվազեցվել է մինչև 50 միլիոն դրամ։ Այդ մասին ֆեյսբուքյան իր էջում հայտնել է նրա պաշտպան Էրիկ Ալեքսանյան:
«ՀՀ հակակոռուպցիոն դատարանի դատավոր Տիգրան Դավթյանը, քննության առնելով Աղվան Հովսեփյանի նկատմամբ կիրառված խափանման միջոց 100 մլն դրամի չափով գրավը նվազեցնելու մասին իմ միջնորդությունը, որոշեց այն բավարարել, գրավի չափը նվազեցնել և սահմանել 50 մլն դրամ», – գրել է Ալեքսանյանը։
2021-ին Աղվան Հովսեփյանին մեղադրանք է առաջադրվել 190 միլիոն դրամ կաշառք ստանալու, խարդախությամբ մոտ 800 միլիոն դրամի գույք հափշտակելու և հանցավոր ճանապարհով ձեռք բերված 1 միլիարդ 299 միլիոն դրամ օրինականացնելու համար։ Նույն օրը նա ձերբակալվել էր, ապա կալանավորվել։ 2022 թվականի օգոստոսի 11-ին Հովսեփյանի խափանման միջոցը փոխվել էր, և նա ազատ էր արձակվել 100 մլն դրամ գրավի ու չհեռանալու մասին ստորագրության դիմաց։