Հայաստանում հունվարի 1-ից ուժի մեջ մտած 7 կարևոր փոփոխությունները

ԵՐԵՎԱՆ, 9 հունվարի․/Նովոստի–Արմենիա/․ 2026 թվականի հունվարի 1-ից Հայաստանում ուժի մեջ են մտել մի շարք կարևոր օրենսդրական փոփոխություններ։ Դրանց թվում են.

1. Պարտադիր զինվորական ծառայության ժամկետի կրճատում

2026 թվականի հունվարի 7-ից հետո ժամկետային զինծառայության զորակոչված քաղաքացիները նախկին 24 ամսվա փոխարեն կծառայեն 18 ամիս:

2. Պարտադիր բժշկական ապահովագրության համակարգի ներդրում

Առաջին փուլում (2026թ.) համակարգը կընդգրկի ՀՀ 1,6 մլն ռեզիդենտների: Դրանք են՝ մինչև 18 և 65-ից բարձր տարիքի անձինք, հաշմանդամություն ունեցողները, սոցիալական նպաստառուները, զոհված զինծառայողների ընտանիքները և 200 հազար դրամից բարձր աշխատավարձ ստացող քաղաքացիները:

3. Աշխատանքային պայմանագրերի կնքման նոր կանոններ

Գործատուի և աշխատողի միջև բոլոր աշխատանքային պայմանագրերն այսուհետ կկնքվեն էլեկտրոնային ձևաչափով՝ պետական թվային հարթակի միջոցով:

4. ՀՀ քաղաքացիություն ստանալու դիմումների ներկայացման նոր կարգ

Հիմնական նորամուծություններն են՝ դիմումների ներկայացումը միայն առցանց, փաստաթղթերի նախնական էլեկտրոնային ստուգումը և պետական տուրքի չափի բարձրացումը: Փոփոխությունները վերաբերում են բոլոր կատեգորիաներին (նատուրալիզացիա, ընտանիքի վերամիավորում, ամուսնություն):

5. Համընդհանուր հետվճար (cashback) ArCa քարտերով անկանխիկ գործարքների դեպքում

Հայաստանում ներդրվում է 2% համընդհանուր հետվճար այն անկանխիկ գործարքների համար, որոնք ֆիզիկական անձինք կատարում են ArCa ազգային վճարային համակարգի միջոցով:

6. Ծանուցումների էլեկտրոնային համակարգ

Նոր համակարգը թույլ կտա պետական մարմիններին պաշտոնական ծանուցումներ ուղարկել ֆիզիկական և իրավաբանական անձանց (ներառյալ ԱՁ-ներին) թվային ուղիներով (ID քարտով նույնականացում, azdarar.am կայք կամ հարկային հաշվետվությունների համակարգ) կամ փոստով:

7. Էլեկտրամոբիլների անմաքս ներմուծման քվոտայի կրկնապատկում

ԵԱՏՄ շրջանակում Հայաստանը 2026 թվականի համար ստացել է 15,000 էլեկտրամոբիլի անմաքս ներմուծման քվոտա: Սա գրեթե կրկնակի շատ է նախորդ տարվա քվոտայից (8,000 միավոր):