8 հունվարի 2026 – 18:02 AMT
PanARMENIAN.Net – «Գնահատման և թեստավորման կենտրոնի» մամուլի խոսնակ Խաչանուշ Գրիգորյանը հայտնել է, որ 2026 թվականի միասնական քննությունների առաջին փուլի համար գրանցվել է 12,538 դիմորդ, մինչդեռ 2025 թվականին այդ թիվը կազմել է 11,605։
Նրա փոխանցմամբ՝ գրանցված անձանց մի մասը պատրաստվում է հանձնել մեկ քննություն, իսկ մյուսները՝ երկու, հայտնում է Panorama.am-ը:
«Առհասարակ հանձնվելու է 23,474 քննություն՝ նախորդ տարվա 21,218-ի դիմաց»,-նշել է ԳԹԿ ներկայացուցիչը։
Առավել մեծ թվով դիմորդներ հայտագրվել են անգլերենի քննության համար՝ 7224 հոգի։ Հաջորդը մաթեմատիկան է՝ 5709 դիմորդ է հայտագրվել այս քննությունը հանձնելու համար։Հայոց լեզվի քննություն հանձնելու համար հայտագրվել է 4657 հոգի, ֆիզիկա առարկայի քննության համար՝ 963 դիմորդ։
Ամենաքիչ գրանցումներն արձանագրվել են աշխարհագրության՝ 79, գերմաներենի՝ 55, ֆրանսերենի՝ 39, իսպաներենի՝ 3 և իտալերենի քննության համար՝ ընդամենը 1 դիմորդ։
Համաձայն ԳԹԿ տնօրենի հրամանի՝ 2026 թվականի առաջին փուլի միասնական քննությունները ըստ առարկաների անցկացվելու են հետևյալ օրերին.
«Հայոց լեզու և հայ գրականություն»՝ հունվարի 24,
«Ֆիզիկա», «Ռուսաց լեզու»՝ հունվարի 25,
«Օտար լեզուներ»՝ հունվարի 31,
«Կենսաբանություն», «Աշխարհագրություն»՝ փետրվարի 1,
«Մաթեմատիկա»՝ փետրվարի 7,
«Քիմիա», «Հայոց պատմություն»՝ փետրվարի 8։