Ակտիվ աշխատանքներ են տարվում սահմանազատման գործընթացի վրա։ Այս մասին հունվարի 8-ին լրագրողների հետ կայացած զրույցում հայտարարել է ՀՀ վարչապետ Նիկոլ Փաշինյանը։
Նա կրկնել է, որ սահմանազատման գործընթացը նպատակաուղղված է Հայաստանի և Ադրբեջանի միջև սահմանի ճշգրտմանը՝ Ալմա-Աթայի հռչակագրի հիման վրա։ Նրա խոսքով՝ այժմ ընթանում է աշխատանքային գործընթաց, սահմանազատումը կշարունակվի, սակայն ամեն ինչ չէ, որ տեղի է ունենում, այսպես կոչված, «գետնի վրա»։ «Ներկայումս որոշակի աշխատանքային գործընթացներ են ընթանում: Իհարկե, ամեն ինչ տեղի կունենա նաև գետնի վրա, քանի որ հաղորդակցությունները և TRIPP նախագիծը գործարկելու համար սահմանի առնվազն այս հատվածները պետք է սահմանազատվեն»,– նշել է Փաշինյանը։
Վարչապետը հավելել է, որ Հայաստանի և Ադրբեջանի միջև հարաբերություններում կան բազմաթիվ հարցեր, որոնք պետք է լուծվեն խաղաղության գործընթացի շրջանակներում։
Վարչապետը ո՛չ հաստատել է, ո՛չ էլ հերքել այն տեղեկությունները, որ ԱՄՆ փոխնախագահը կարող է այցելել Հայաստան՝ TRIPP նախագիծը մեկնարկելու համար։ Փաշինյանը եզրափակել է, որ միայն պաշտոնական հայտարարությամբ կարող է 100%-ով հաստատել այս մակարդակի այցի մասին տեղեկատվությունը։