ՀՀ վարչապետ Նիկոլ Փաշինյանն այսօր կառավարության այս տարվա անդրանիկ նիստում անդրադարձել է կենսաթոշակների բարձրացման հարցին և օրինակ բերել. ՎԻԴԵՈ
ԵՐԵՎԱՆ, 8 հունվարի․/Նովոստի-Արմենիա/․ ՀՀ վարչապետ Նիկոլ Փաշինյանն այսօր կառավարության այս տարվա անդրանիկ նիստում անդրադարձել է կենսաթոշակների բարձրացման հարցին և օրինակ բերել։
«Ինձ մոտ շատ տպավորել է բոլորովին վերջերս, նախորդ տարի, մեր հարգարժան թոշակառուներից մեկի հետ ունեցած խոսակցությունը: Նա ասում էր, որ 50,000 և ավելի դրամ թոշակ է ստանում, որից 27,000-28,000-ը ծախսում է տունը տաքացնելու վրա, բայց արդյունքում տունը չի էլ տաքանում»,-ասել է Փաշինյանը՝ հավելելով, որ այդ թոշակառուն ասում էր, որ Կառավարությունը պետք է թոշակը բարձրացնի, որպեսզի ինքը կարողանա տաքանալ։
«Ես սկսեցի հետազոտել այդ իրավիճակը կոնկրետ հասցեով»,- ասել է Նիկոլ Փաշինյանը և այդ առնչությամբ հետևություններ արել։
«Ես արձանագրեցի, որ եթե 20,000 դրամով բարձրացնենք թոշակը, նույն քաղաքացին էլեկտրաէներգիայի և տունը տաքացնելու վրա ծախսելու է արդեն ոչ թե 27,000 դրամ, այլ 35,000 դրամ, բայց տունը, միևնույն է, չի տաքանալու, որովհետև այդ տանը կան բազմաթիվ խնդիրներ, սկսած պատուհաններից, դռներով, վերջացրած պատերով և այդպես շարունակ»,-նշել է նա:
Նրա խոսքով, պետք է փորձել ծախսել ավելի քիչ և ներդրումներ անել, որպեսզի տունը էներգետիկ առումով ամբողջությամբ վերափոխվի։
«Մենք սովորաբար ի՞նչ ենք անում։ Ասում ենք՝ դե 27000 դրամը քիչ է տունը տաքացնելու համար, եկեք ծախսենք 35.000 դրամ, բայց,մեկ է, 35.000 դրամով էլ տունը չի տաքանում, որովհետև տունը տաքացնելու համար մենք, ընդհակառակը, պետք է մեծ հաշվով փորձենք ծախսել ավելի քիչ, ասենք 18.000 դրամ և ներդրումներ անենք, որպեսզի տունը, բնակարանը էներգետիկ առումով ամբողջությամբ վերափոխվի»,– եզրափակել է նա։