Կառավարությունն այսօրվա նիստում ընդունեց 2026 թվականին վարժական հավաքներ հայտարարելու մասին որոշումը։
Ըստ որոշման՝ 2026 թվականի ընթացքում կանցկացվեն վարժական հավաքներ՝ պահեստազորի առաջին խմբում հաշվառված շարքային, ենթասպայական և սպայական կազմերի պահեստազորայինների համար։ Հավաքների նպատակն է ռազմական հմտությունների կատարելագործումը, վերապատրաստումն ու պատրաստումը, ինչպես նաև ՀՀ զինված ուժերի մարտական հերթապահության ուժեղացումը՝ պահեստազորայինների ներգրավման միջոցով։
Որոշմամբ սահմանվում է վարժական հավաքների անցկացման ժամկետները, նպատակները, ներգրավվող պահեստազորայինների թվաքանակն ու մասնագիտությունները, ինչպես նաև ներգրավման փուլերը։ Նախատեսվում է, որ յուրաքանչյուր քաղաքացի կարող է ներգրավվել ոչ ավելի, քան 25 օրացուցային օր ժամկետով։
Վարժական հավաքների կազմակերպման ծախսերը կկատարվեն ՀՀ 2026 թվականի պետական բյուջեի միջոցների հաշվին։ Ընդհանուր անհրաժեշտ ֆինանսավորումը կազմում է 3 մլրդ 111 մլն դրամից ավելի, որի մի մասը կփոխհատուցվի պաշտպանության նախարարության համակարգում իրականացվող կառուցվածքային փոփոխությունների արդյունքում տնտեսված միջոցներով։