Թուրքիայի նախագահ Ռեջեփ Թայիփ Էրդողանը հերքել է տեղեկությունները, որ Միացյալ Նահանգները դիմել է Թուրքիային՝ Վենեսուելայի առաջնորդ Նիկոլաս Մադուրոյին երկրում աքսոր առաջարկելու համար՝ նրա գերեվարումից առաջ, ասելով, որ «մենք նման լուր չենք ստացել», գրում է Turkiye today-ը։
Այս մեկնաբանությունները հնչել են միջազգային արձագանքի ֆոնին, որը տեղի է ունեցել հունվարի 3-ին ԱՄՆ ուժերի կողմից հատուկ ռազմական գործողության ժամանակ Մադուրոյի ու նրա կնոջ առևանգումից և նրանց Նյու Յորք տեղափոխելուց հետո՝ թմրանյութերի ապօրինի շրջանառության և դրանց հետ կապված մեղադրանքների համար դատարանի առջև կանգնելու համար։
ԱՄՆ որոշ պաշտոնյաներ և լրատվամիջոցների հաղորդագրություններից ենթադրություններ էին տարածվել, որ Վաշինգտոնը Մադուրոյին առաջարկել է խաղաղ ելք, այդ թվում, հնարավոր է, Թուրքիայում աքսորը, ինչը, ըստ որոշ տեղեկությունների, նա մերժել է, ինքն էլ հանգեցրել է հարձակման։
«Նա (Մադուրոն) կարող էր այսօր լինել Թուրքիայում, բայց նա Նյու Յորքում է։ Մադուրոն, բացի իրենից, ոչ ոքի չի կարող մեղադրել։ Թրամփը նրան ելք տվեց։ Նա որոշեց չենթարկվել Թրամփին և ԱՄՆ զինվորականներին, և նա բանտում է, որտեղ նա արժանի է լինել»,- հունվարի 5-ին հայտարարել էր Հանրապետական սենատոր Լինդսի Գրեհեմը։
NYT-ն էլ հաղորդել էր, որ Թրամփի վարչակազմը դեկտեմբերին Մադուրոյին վերջնագիր է ներկայացրել՝ կոչ անելով նրան «թողնել պաշտոնը և գնալ աքսորի Թուրքիայում»։ Ըստ մի քանի ամերիկացիների և վենեսուելացիների, որոնց մեջբերել է Times-ը, Մադուրոն վերջնագիրը մերժել է զայրույթով։
The Times-ը հաղորդել էր, որ վերջին շաբաթներին Մադուրոյի պարբերական հրապարակային պարերը և անտարբերության այլ դրսևորումներն օգնել են Թրամփի թիմի որոշ անդամների համոզել, որ Վենեսուելայի նախագահը ծաղրում է իրենց։
Էրդողանը հայտնել է, որ երկուշաբթի ԱՄՆ նախագահ Դոնալդ Թրամփի հետ հեռախոսազրույցի ժամանակ մտահոգություններ է հայտնել Վենեսուելայի կայունության վերաբերյալ։ Թուրքիայի կաբինետի այս տարվա առաջին նիստից հետո Էրդողանն ասել է, որ Թրամփի հետ հանդիպման ժամանակ ընդգծել է՝ Վենեսուելային չպետք է թույլ տալ անկայունության մեջ ընկղմվել։
«Մենք չենք արդարացնում քաղաքական օրինականությունը և միջազգային իրավունքը խախտող որևէ գործողություն, որտեղ էլ այն տեղի ունենա աշխարհում»,- հայտարարել է Էրդողանը։
Թարգմանությունը՝ Էմմա Չոբանյանի