7 հունվարի 2026 – 15:32 AMT
PanARMENIAN.Net – «Քաղաքացիական պայմանագիր» կուսակցության նախընտրական ցուցակը պատրաստ է։ Այս մասին ասել է կուսակցության աշխատակազմի ղեկավար Արուսյակ Մանավազյանը, հայտնում է «Փաստինֆոն»։
«Մենք բոլոր թեկնածուներին լսել ենք, գրանցել, այսինքն հստակ պարզ է, թե քանի հոգուց է ցուցակը բաղկացած, ինչ մնում է ցուցակի հրապարակմանը, ապա այս պահին չունենք հստակ որոշում, առաջիկա վարչության ժողովներում այդ մասով ևս որոշում կկայացնենք»,-ասել է նա:
Նրա փոխանցմամբ՝ 380 հայտատուից 280-ն ընդգրկվել է ընտրացուցակում։
«Ինքնաբացարկ հայտնած թեկնածուներ ևս եղել են, մոտ մեկ տասնյակի չափով թեկնածու ինքնաբացարկ է հայտնել»,-ասել է նա:
Ինչ վերաբերում է հարցին, թե ինչպես է որոշվելու, թե ընտրացուցակում ով որ տեղում է լինելու, ապա Մանավազյանն ասել է, որ որոշումը կկայացվի ներքին քվեարկությամբ։
«Տեղի է ունենալու պատվիրակների քվեարկություն, որով էլ կդասավորի ցանկը։ Կարծում եմ՝ այս գործընթացը կկազմակերպվի փետրվարին»,-ասել է նա:
Հարցին, թե շա՞տ են անկուսակցական թեկնածուները՝ Մանավազյանն ասել է, որ շատ չեն, բայց կան:
ՀՀ-ում խորհրդարանական ընտրություններն անցկացվելու են 2026-ի հունիսին: