7 հունվարի 2026 – 11:08 AMT
PanARMENIAN.Net – Երևանի քաղաքապետարանը հայտարարել է, որ, ըստ ավագանու սահմանած պարտադիր կարգի, անշարժ գույք օգտագործող տնտեսվարողները պարտավոր են հոգալ իրենց օբյեկտներին կից ընդհանուր օգտագործման տարածքների բարեկարգման հարցը՝ մաքրելով հարակից մայթերը ոչ միայն ձյան, այլ նաև սառույցի կուտակումներից:
Նշվում է, որ հակառակ դեպքում նրանք պատասխանատվության կենթարկվեն:
«Երևանի ավագանու սահմանած պարտադիր կարգի համաձայն՝ անշարժ գույք շահագործող տնտեսվարողները պարտավոր են ապահովել իրենց օբյեկտներին հարակից ընդհանուր օգտագործման տարածքների բարեկարգումը։
Պարտավորությունը ներառում է ոչ միայն տեղացած ձյան ամենօրյա մաքրումը, այլև տեղումների դադարից հետո մայթերի ասֆալտբետոնե և սալիկապատ հատվածների ամբողջական մաքրումը ձյան և սառույցի կուտակումներից։
Վարչական շրջանները շարունակում են տնտեսվարողների ծանուցման գործընթացը՝ սահմանված կարգի պահպանումն ապահովելու նպատակով։
Կարգը չպահպանելու դեպքում կիրառվելու են վարչական պատասխանատվության միջոցներ։
Միաժամանակ հիշեցնում ենք, որ բազմաբնակարան շենքերի մուտքերի և հարակից տարածքների մաքրման պատասխանատվությունը կրում են համատիրությունները, որոնց համայնքը աջակցում է անհրաժեշտ մաքրման միջոցներով»,- ասված է հաղորդագրությունում։