Ռուսաստանի կառավարությունը մեղադրել է Կիևին Ուկրաինայում պատերազմը դադարեցնելու ԱՄՆ պլանի շուրջ բանակցությունները «տորպեդահարելու» մտադրության մեջ: Ուկրաինայի իշխանությունների կողմից մի քանի օր առաջ ներկայացված ԱՄՆ պլանի վերանայված տարբերակը «արմատապես տարբերվում է» Մոսկվայի կողմից Վաշինգտոնի հետ քննարկված տեքստից, ուրբաթ՝ դեկտեմբերի 26-ին, ռուսական հեռուստատեսությամբ հայտարարել է Ռուսաստանի փոխարտգործնախարար Սերգեյ Ռյաբկովը։
«Ուկրաինայի հասարակական խմբերում հայտնվել են 20 կետանոց պլանի մասին հղումներ: Մենք գիտենք, որ այս պլանը արմատապես, եթե կարելի է այն նույնիսկ պլան անվանել, տարբերվում է այն 27 կետերից, որոնց վրա մենք վերջին շաբաթներին՝ դեկտեմբերի սկզբից սկսած, աշխատում ենք ամերիկյան կողմի հետ», — ասել է Ռյաբկովը «60 րոպե» հաղորդմանը տված հարցազրույցում։
Դիվանագետի խոսքով՝ Ուկրաինան և նրա «հովանավորները, մասնավորապես Եվրամիությունում, որոնք հանձնառու չեն համաձայնագրին, կրկնապատկել են այն տորպեդահարելու իրենց ջանքերը»։ «Առանց այս ճգնաժամի արմատական պատճառը հանդիսացող խնդիրների պատշաճ լուծման, որոնք լուծում են պահանջում, վերջնական համաձայնություն չի լինի», — ընդգծել է Սերգեյ Ռյաբկովը։
Նա հավելել է, որ ցանկացած առաջարկ պետք է մնա ԱՄՆ նախագահ Դոնալդ Թրամփի և Ռուսաստանի նախագահ Վլադիմիր Պուտինի միջև օգոստոսին Ալյասկայում կայացած գագաթնաժողովում համաձայնեցված շրջանակներում։